Galu duas chidas at a èssere possìbile a nos espressaremus cun unu Eja o cun unu No in contu de giustìtzia. Sa dibata est animada, ma no at a èssere una gherra intre sas suas optziones presentes in sas ischedas; s’àtera pertzentuale chi cheret carculada est sa de s’astensionismu, comente pro cada referendum abrogativu. De onni manera, cun s’artìculu de oe bidimus sas àteras duas chistiones chi nos dant apuntamentu su 12 de làmpadas (sos primos tres cuesitos los amus bidos domìniga colada)
Cun s’ischeda murra b’amus su de bator cuesitos in contu de valutatzione de sos magistrados. A su presente custa valutatzione ruet cada bator annos movende dae sos pàrreres motivados, ma non vinculantes, de sos òrganos chi cumponent su Consìgiu superiore de sa magistradura e su Consìgiu diretivu de sa Corte de Cassatzione. In custos òrganos, in prus de sos magistrados, b’at finamentas avocados e professores universitàrios, ma sunt sos magistrados ebbia sos chi podent votare. Pro sos de su Eja, a su presente b’amus una subrapositzione intre controllores e controllados. Sos de su No narant chi no est de giudu a fàghere valutare sos magistrados dae sos avocados ca, sende controparte de sos pm, sas valutatziones diant pòdere èssere negativas. E chi sos magistrados diant pòdere èssere influentzados.
Su de chimbe cuesitos (ischeda birde) pertocat imbetze su rennou de su Consìgiu superiore de sa magistradura. Su Csm est s’òrganu de autoguvernu de sos magistrados e de 27 membros suos, 16 sunt eletos dae sos magistrados matessi (8 dae su parlamentu, sos àteros tres sunt su presidente de sa Repùblica, su primu presidente e su Procuradore generale de sa Corte de Cassatzione). Sos 16 eletos devent collire, pro si candidare, nessi 25 firmas e custa cunditzione, a bisu de sos referendàrios chi cherent abrogare sas normas atuales in matèria, agiudat su currentismu. Ma a bisu de sos chi nos invitant a votare No est pretzisu a mantènnere sa regorta de sas firmas, comente in sas àteras leges eletorales, pro chi b’apat una primu passàgiu in sa seletzione.
màuru piredda
Leave a comment