Chie semus

Limba Sarda 2.0 est unu blog, revista, diàriu o giornale digitale chi cheret dare informatziones subra sa chistione de sa limba in Sardigna. Cheret isparghinare fatos, cummentos e opiniones subra sa polìtica linguìstica in s’ìsula nostra sena èssere neutrale a manera farsa, ma ponende semper in contu su parre de sos operadores e de sos amantiosos de limba sarda.

In custos annos su nùmeru de cussos chi cherent un’isvilupu modernu e àbile de sa limba sarda s’est ismanniadu e sos chi sunt andende a bias a una professionalizatzione in intro de custu mundu cherent una polìtica linguìstica prus de coràgiu. B’at de nàrrere chi ostàculos, barrancos e innimigos internos e de fora non fartant. E nois non timimus a nos confrontare sende chi creimus a s’unidade de sos chi traballant pro sa limba.

Sa punna prus de importu de Limba Sarda 2.0 at èssere cussa de dare a operadores, simpatizantes e cumponentes de su Movimentu Linguìsticu Sardu sas informatziones e sas novas chi serbint pro si che pòdere difèndere dae sos innimigos e, fatu fatu, pòdere atacare pro fraigare sas cunditziones de una polìtica noa pro sa limba.

Limba Sarda 2.0 cheret una ortografia ùnica e ufitziale pro su sardu, ma aprètziat e istimat calesisiat forma de iscritura pessonale, munitzipale, artìstica de sa limba sarda. A sa matessi manera si cherent ospitare e defensare sas àteras limbas de Sardigna: su gadduresu, su turritanu, su catalanu e su lìgure de Carloforte e Cadesedda.

Ognunu podet iscrìere in Limba Sarda 2.0 comente li agradat, ma sa redazione at a impreare sa Limba sarda comuna, o cale chi siat àtera variedade ufitziale chi sa Regione Sarda at a adotare. Pro como non si podet fàghere a mancu de iscrìere finas in italianu, ma punna de sa redatzione est a fàghere unu blog-giornale totu in sardu cun tradutziones in italianu e english. Isperamus de la pòdere acumprire.

Limba Sarda 2.0 est unu blog-diàriu democràticu chi promovet s’idea de sa natzione sarda e chircat su reconnoschimentu de sos deretos linguìsticos de sos sardos. Est abertu a totu sas optziones istitutzionales, dae s’indipendentismu a s’autonomia, chi potzant conduire a custu resurtu.

Limba Sarda 2.0 non faghet chistiones de partidos o de fileras de Manca o de Dereta. Sa chistione de su sarvamentu de sa limba est trasversale, pluripartitica, transardista e aberta a totu sos contributos onestos, abbistos e de profetu pro sa batalla nostra.

Su giornale si càndidat a rapresentare totu sas cumponentes de su Movimentu Linguistìcu Sardu pro lu fàghere crèschere in sa sotziedade.