Sa situatzione in Haiti sighit a èssere mala meda. Sos grupos criminales sighint a degolliare su logu, a brusiare e a ochìere. Eris 2 de abrile su grupu criminale de Barbecue, s’ex politzioto Jimmy Chérizier, at chircadu de assartiare, in sa capitale, su palatzu natzionale, sìmbolu de sa natzione afroamericana e de pònnere fogu a su Ministèriu de s’Internu. Sas fortzas de seguresa nche sunt resurtadas a respìnghere s’atac.
Durante s’atzione sos malefatores ant postu fogu a una màchina blindada de sa politzia.
Est istada s’acme de una sèrie de ofensivas contra a su pagu chi abarrat de s’istadu in s’ala otzidentale de Hispaniola.
In antis de custu atacu ant agatadu bator mortos male in sas carreras.
In prus ddo’at àpidu atentados contra a sa cumpangia elètrica pùblica Electricité d’Haïti, chi ant acabbadu de impeorare sas cunditziones de vivibilidade. Giai chimbanta mìgia persones ant abbandonadu s’àrea de sa capitale Port-au-Prince sas ùrtimas tres chidas.
Pro custu motivu ant illonghiadu s’istadu de allarme chi fiat in vigore dae su 7 de martzu nessi a sa die de oe, 3 de abrile, in s’ala otzidentale de s’istadu, in ue belle totu su territòriu est controlladu dae sas bandas criminales chi òperant comente grupos paramilitares.
Su primu ministru Ariel Henry, chi s’agatat in Puerto Rico, chi si fiat giai dimìtidu dae presidente, at annuntziadu chi s’at a dimìtere aizu formadu su Cussìgiu Presidentziale de Transitzione. Sa nàschida de custu organismu provisòriu, chi diat dèpere elègere su primu ministru e cunvocare eletziones, est istada detzìdida chida passada dae su Caricom.
Custa istitutzione, Caribbean Community, est nàschida comente Caribbean Community and Common Market in su 1973 e est cumposta dae 15 rapresentantes, batòrdighi istados e una dipendèntzia, Monserrat, territòriu britànnicu de ultramare.
(gianni muroni)
Leave a comment