Dae su 29 de freàrgiu coladu Haiti non tenet prus una ghia polìtica.
A pustis de un’atacu coordinadu de totu sas bandas criminales de su paisu a sa capitale Port-au-Prince, su presidente ad interim Ariel Henry s’est dimìtidu dae sa càrriga de primu ministru.
Henry fiat in càrriga dae tres annos, est a nàrrere dae cando ant mortu a su presidente de issara Jovenel Moïse.
Moïse est istadu vìtima, su 7 de trìulas de su 2021, de unu commando de òmines armados chi dd’at mortu a balla. Sos assalidores fiant colombianos e in parte haitianos bènnidos dae Istados Unidos.
S’ipòtesi prus probàbiles est chi sos mortores esserent sicàrios de sos narcotraficantes de Colòmbia, bidu ca su presidente aiat detzìdidu de gherrare contra a custu fenòmenu criminale.
Mortu issu su ruolu ad interim dd’aiat leadu su primu ministru Claude Joseph, chi però si fiat dimìtidu su 19 de trìulas de su matessi annu. Sa die in fatu fiat intradu siat comente presidente siat comente primu ministru, semper ad interim, Henry.
In sas ùrtimas chidas duncas sa parte otzidentale de s’ìsula de Hispaniola est in una situatzione de caos assolutu.
Su protagonista de custa ondada de violèntzia e lider de sos rebelles est Jimmy Chérizier, mutidu Barbecue. Ex poliziotu, est su capu de unu grupu criminale connotu comente FRG9 (Fortzas Rivolutzionàrias G9).
Indipendente dae sa Frantza dae su 1804, Haiti, cun una populatzione belle de su totu afroamericana, est istadu su segundu paisu indipendente de su continente americanu, a pustis de sos Istados Unidos.
No at mai tentu paghe però. Passada s’època de terrore de sos Duvalier babbu e fìgiu, Papa Doc e Baby Doc, dae su 1957 a su 1986, ddo’est istadu in tempos prus acanta su terremotu terrìbile de su 2010. In cudda ocasione su presidente de su Sènegal Wade aiat ofertu a sos haitianos de torrare a Àfrica, sa terra de sos majores issoro, dende·ddis una parte de su territòriu senegalesu.
(gianni muroni)
Leave a comment