Sas protestas de massajos e pastores, cumintzadas in manera coordinada in Germània a sa fine de s’annu aizu coladu, si sunt ispainende in totu su continente.
Sos massajos frantzesos ant fatu blocos istradales a s’intrada de sa capitale issoro. In su paisu transalpinu puru, est sa denùntzia de sos manifestantes, sas polìticas agrìculas de su guvernu arriscant de fàghere dannu a sa massaria. S’obietivu de sas protestas est de torrare a tènnere una soberania agrìcula contra a sas detzisiones globalistas de s’eurocratzia.
Sas protestas sunt lòmpidas finas a su coro de s’Unione Europea, in Brussellas. In prus sos massajos belgas ant annuntziadu una manifestatzione in su portu de Zeebrugge.
A s’àtera ala de su continente si sunt faghende a intèndere finas sos ispagnolos. Sas chidas chi benint sas organizatziones de categoria Asaja (Asociación Agraria de Jóvenes Agricultores), COAG (Coordinadora de Organizaciones de Agricultores y Ganaderos) e UPA (Unión de Pequeños Agricultores y Ganaderos) ant annuntziadu una mobilitatzione. Pedint càmbios de polìtica a sa UE, a su Guvernu ispagnolu e finas a sas comunidades autònomas de Ispagna.
Como a presse ant a èssere ratificados acordos de iscàmbiu lìberu cun sos paisos de su Mercosur, in Amèrica latina, e sa Nova Zelanda. Sos assòtzios ispagnolos cherent chi custas ratìficas non siant firmadas. Intre sas rechestas issoro ddo’est finas chi si fatzant prus controllos in sas importatziones dae Maroco.
Aterunu obietivu de sos sartàrgios ibèricos est sa Polìtica Agrària Comuna de s’Unione Europea, cunsiderada tropu complicada a livellu burocràticu.
In fines, in Sardigna ddo’at una manifestatzione de su Movimento Pastori Sardi e de su Movimento Riscatto Agricolo in su portu de Casteddu. Ant cumintzadu eris 30 de ghennàrgiu una mobilitatzione de chimbe dies.
Istechida s’ant a atopare cun sos responsàbiles de Laore e Agris, sas duas agentzias regionales de su setore.
(gianni muroni)
Leave a comment