Sa Germània est assistende a sa protestas de sos massajos contra a sas polìticas “birdes” de su guvernu.
Cumintzada su 18 de nadale in Berlinu, sa mobilitatzione est torrada a cumintzu custa chida in totu su paisu, ispainende·si a àteras tzitades, incruidas Mònacu de Baviera e Colònia.
Su chi pistighìngiat massimamente a sos traballadores de su setore agrìculu est sa detzisione de sas autoridades de nde leare sos sussìdios in forma de iscontos pro su gasòliu. In antis sa fine de sos agiudos depiat èssere adotada luego, in unu segundu momentu, pròpiu pro more de sas manifestatziones, s’esecutivu at istabilidu de abbacare su tantu a bellu a bellu pro sessare de su totu in su giru de tres annos. Mancu custa optzione però ddis agradat a sos sartàrgios.
A custu problema cheret agiunta sa fine de agiudos econòmicos pro sos mezos puru. In totu sos sussìdios sunt unos 900 milliones a s’annu.
A ispìnghere su cantzilleri Scholtz, lider de sa coalitzione SPD, Birdes e Liberaldemocràticos, in custa diretzione sunt a unu chirru su bisòngiu de megiorare sos contos pùblicos, pro tuponare su deficit de 60 milliardos de èuros, e a un’àteru s’adesione a sas polìticas globales chi bident sa massaria comente unu perìgulu pro s’ambiente. Segundu sos ambientalistas su setore diat èssere responsàbile de s’emissione de unu 7% de sos gas serra.
Sas protestas sunt articuladas in corteos e blocos istradales in sas tzitades. In prus ddo’at àpidu, in Berlinu, calicunu chi at iscarrigadu ledàmene in dae in antis de sas sedes de sos partidos de sa coalitzione de guvernu, cumintzende dae sa SPD, su Partidu Sotzialdemocràticu de Scholtz.
Belle totu sos massajos teutònicos, unu 90%, sunt rapresentados dae su Deutscher Bauernverband, su sòtziu de sos massajos tedescos.
A sas protestas in su territòriu de sa Repùblica Federale Tedesca si sunt agiuntos in carchi ocasione finas sartàrgios de àteros istados a làcana, che a Olanda e Polònia.
(gianni muroni)
Leave a comment