L’ant a presentare chenàbura su 15 de maju in su Salone del libro de Torinu. Acò s’essida de “Àidos – Rivista di linguistica, letteratura e storia sarda”: publicada dae sa domo editora Condaghes. Contivigiadu dae Gabriele Tanda, Mauro Piredda e Riccardo Mura, su periòdicu naschet a cuncordu cun su Cesim/Aps (Centro studi Identità e Memoria) de Tàtari, e marcat su comintzu de unu progetu editoriale ambitziosu. Sa punna? Sestare a nou sa dibata culturale in Sardigna pro mèdiu de su rigore iscientìficu e de s’abertura a su cunfrontu, cun publicatziones “saltuarias” chi nche bàrigant sas essidas fissas cun sa lestresa issoro, preferende su meledu fundudu.
Su tìtulu matessi, “Àidos”, inditat unu coladòrgiu e unu logu de possibilidades, metàfora de un’òpera chi cheret èssere unu ponte intre disciplinas e visiones diferentes.
S’identidade profunda de sa rivista est crara: sa voluntade, a tesu dae sas polèmicas social, de fraigare unu logu ue poetas, istudiosos e intelletuales si potzant agatare pro mèdiu de sa dialètica de sas ideas. E craru est finamentas s’obietivu: ispàrghere sa cultura sarda lassende·nche a banda su provintzialismu de chie chircat su cunsensu esternu, e sa torrada a un’identidade musealizada e tètera. Sa publicatzione tenet un’istrutura tripartzida chi sighit linguìstica, istòria e literadura, oferende una panoràmica articulada de sa realidade isulana cuntemporànea.
Su primu grandu blocu temàticu est dedicadu a sa figura de sos neolocutores, analizada pro mèdiu de prospetivas multidisciplinàrias. Riccardo Mura, autore de su sàgiu intituladu “La lingua è di chi la trasmette”, analizat su ruolu detzisivu de chie sèberat in forma ativa de adotare e de intregare a su tempus benidore sas limbas de Sardigna, barighende·nche sa visione traditzionale de su faeddadore nativu.
In fatu a custa riflessione b’est su contributu de Caterina Vittoria Roselli, chi esàminat su ligàmene intre “li neofaeddadóri” e sas temàticas de gènere e intersetzionales, frunende una letura innovativa de sas dinàmicas sotziolinguìsticas.
Sighit un’intervista de Gabriele Tanda a Simone Pisano, professore assotziadu de linguìstica e dialetologia in s’Universidade pro istràngios de Siena, chi aprofundit galu de prus sos disafios de sa modernidade pro su patrimòniu linguìsticu sardu.
Sa setzione dedicada a s’istòria e a sa memòria est dominada dae su contu de s’atividade de su Cesim. Si Giuseppina Marras analizat oto annos de chircas de su tzentru intre su 2017 e su 2025, evidentziende s’aficu pro sa valorizatzione de s’identidade sarda, Sara Mameli ponet s’atzentu in s’importu de sa formatzione. Unu momentu de grandu ammaju est rapresentadu dae su reportage “Il velo arancione”, firmadu dae Gabriele Tanda e Riccardo Mura, chi nche giughet su letore a s’iscoberta de sas domus de janas de Busache, testimonia archeològica de primore.
A serrare sa prima essida, su meledu ampru pro su chi pertocat su sistema literàriu isulanu. Gabriele Tanda, ponende in parte Anna Cristina e Speranza Serra, proponet un’analizu teòricu chi iscumbatat cuntrastos e cunvergèntzias tra sa produtzione in sardu e sa chi est in italianu.
Custa indàgine agatat un’aplicatzione pràtica sua in sa setzione “Racconti incrociati”, ue Alessandro De Roma e Giuseppe Tirotto oferint duos imaginàrios narrativos distintos in contu de libertade e de servìtziu. Pro mèdiu de sos contos “La maschera” e “Acchiddà di l’ideali”, sa rivista dimustrat comente sa literadura si potzat fàghere istrumentu de chirca esistentziale e sotziale, serrende su primu nùmeru cun sa promissa de bi la sighire in cherta de àidos culturales noos pro sa Sardigna de cras.
Sa presentada ufitziale de sa rivista est programmada pro chenàbura su 15 maju a sas 15.40 in su Salone del libro de Torinu, in intro de s’addòbiu cuidadu dae su Cesim in contu de Domus de Janas in su Spazio Sardegna, Padiglione 2, stand k129 j130.
Sas dies imbenientes at a èssere possìbile a iscarrigare sa rivista in pdf dae su situ web cesimsardegna.com.
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment