S’integratzione de s’intelligèntzia artifitziale generativa cun sos traballos de cada die est tzelebrada medas bortas comente sa solutzione a cada problema, mescamente in contu de efitzèntzia. Como, però, b’at un’istùdiu nou intituladu “AI Assistance Reduces Persistence and Hurts Independent Performance” chi carchi meledu lu diat dèvere inchèndere.
Su costu chi in pagos bident est de casta cognitiva e naschet pròpiu dae custa dèlega tecnològica. Custa chirca, cun firmas de sa Carnegie Mellon University, de s’University of Oxford, de su Massachusetts Institute of Technology e de sa Ucla de Los Angeles, at postu in parte prus de 1.200 partetzipantes, boghende a campu unu fenòmenu chi ponet anneos: gràtzias a s’AI semus prus lestros in cussa iscuta, ma bi perdimus in contu de perseveràntzia in cara de sos disafios.
Bi perdimus capatzidade. Su coro de sa chirca est in s’anàlisi de sa persistèntzia, est a nàrrere sa voluntade de una persone de sighire a investire isfortzos in unu còmpitu difìtzile mancari sos fallimentos initziales. Pro mèdiu de esperimentos controllados, sos chircadores ant osservadu chi bastant petzi 10 minutos de interatzione cun un’assistente AI pro alterare su cumportamentu umanu. Mancari su sustegnu tecnològicu megioret sas prestatziones lestras, sos sugetos punnant prus in presse a sa rinùntzia cando custu sustegnu mancat.
Est una mèngua de s’atza chi non pertocat petzi sa lestresa, ma fintzas sa calidade de s’imparòngiu. Cando una màchina frunit solutziones istantàneas, sa mente s’abituat a unu cussìgiu lestru intrende·nche a una cunditzione de dipendèntzia funtzionale: comente s’AI no est a disponimentu, o puru fallit, s’utente est disarmadu, no ativat cussas risursas de problem-solving chi pedint un’isfortzu perlongadu.
In tzifras, su tassu de risolutzione de sos problemas nche falat dae su 73 a su 57% in sas proas matemàticas. Creschet imbetzes sa tendèntzia a lassare sos cuesitos. In finitias: balangiamus produtividade oe, ma pro unu cras b’at perìgulu de un’atrofia cognitiva. S’insistèntzia est su mùsculu de s’innovatzione; sena de issa, sa capatzidade umana de afrontare problemas inèditos s’indebìlitat. Est pro custu chi sos istudiosos inditant unu càmbiu de paradigma narende chi s’AI non si devet limitare a rispòndere a sas pregontas, ma sustènnere s’aprendimentu, controllare sos progressos e dare prioridades a sa crèschida de sa persone.
Gianfranca Orunesu
(Foto de Google DeepMind)
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment