Sa speaker de sa Camera de su Cungressu de sos Istados Aunidos est lòmpida a Taiwan. Su biàgiu est pro afortiare su ligàmene intre sos USA e s’ìsula indipendente dae su 1948, ma chi est in sa mìria de sa Tzina dae semper, e acontesset a pustis de bintighimbe annos dae s’ùrtima bìsita de custa genia. Sa noa at fatu deretu pesare sas istitutziones tzinesas chi ant minetzadu vindita. Amus giai faeddadu (inoghe) de s’importu mannu chi tenet custu Paisu pro su mundu de sa tecnologia e pro sos echilìbrios mundiales. Sa bìsita de Nancy Pelosi suprit a pustis de meses de gherra in Ucràina e de instabilidade internatzionale. Tando comente mai custu biàgiu chi podet pònnere àteru fogu in una situatzione giai alluta?
Bisòngiat ammentare chi nen sa Rùssia nen sa Tzina ant in consideru mannu su deretu de sos pòpulos a si autodeterminare o a abarrare cun s’identidade issoro e nemmancu sos deretos de sas persones. Mescamente sa Tzina est famada pro sa repressione de sos uiguros e de sos tibetanos e fintzas in Hong Kong no at mustradu rispetu meda pro sa gana de democratzia de sos tzitadinos de sa tzitade. Dae s’àtera ala sos Istados Aunidos ant inghitzadu unu muntone de gherras pro abarrare sos meres de sa polìtica mundiale, cun sa troga prus ùtile in su momentu.
Pro sos americanos, tando, sa visita de sa Pelosi cheret acrarire chi s’Otzidente sustenet sa voluntade de sos taiwanesos de istare a sa sola (no pro bonu coro, ma ca est de importu tropu mannu pro intrare in sa Tzina), e chi no at a atzetare un’agiudu tropu mannu a sa Rùssia in custu momentu de pelea. In concruos sos americanos bolent pònnere làcanas a s’ismànniu de s’influèntzia de sas duas potèntzias chi sunt creschende dae annos.
Sa Tzina at sa fortza de tènnere a suta de issa prus de unu milliardu de persones de sos sete chi bi sunt in su mundu intreu, un’economia chi curret e sa punna de èssere su Paisu prus forte de su mundu. Su disafiu est perigulosu e mannu, ca s’arriscu est semper cussu de una gherra mundiale.
In custu giogu non b’at Paisu ghiadu dae bonidade ebbia: cada unu faghet s’interesse suo. Sa timoria de s’Otzidente est chi si sa Tzina e sa Rùssia ant a bìnchere podent rùere a terra sos sistemas econòmicos e sotziales nostros, cun deretos e bonu istare. Dae s’àtera banda sa Tzina est tropu manna pro non si leare unu rolu de primore in su mundu, prendende e influentzende sos sèberos de sos Istados.
(redatzione)
Leave a comment