Micheli Pinna pigat 50.000 èuros e làudat a sa Giunta Pigliaru

Micheli Pinna pigat 50.000 èuros e làudat a sa Giunta Pigliaru

de Giuseppe Pepe Coròngiu  – mastino

Intre sos provedimentos de s’ùrtima finantziària unu est fuidu a sos osservadores. Est su rifinanziamentu cun 50 mìgia èuros de sa lege  fata aposta, ad personam o ad istitutum, si podet nàrrere, pro s’Istitutu Bellieni de Tàtari unos cantos annos a como. Est cun sa lege de bilantzu 2015 chi sa Regione at detzisu de sustènnere s’atividade istitutzionale de s’organismu de su cale est lider Michele Pinna, professore de filosofia in unu litzeu de Tàtari.

Pinna at luego torradu gràtzias a sa Giunta Regionale, cun unu interventu  publicadu eris dae su cuotidianu La Nuova Sardegna in ue at chircadu de defensare su chi non si podet defensare faghende su peana de sas polìticas linguìsticas regionales, ma in su su cale issu puru at amitìtidu chi su dinare chi su guvernu regionale at postu est pagu. Però intro de custu pagu naramus chi s’est agatadu su mèdiu de bi lu cuntentare.

Custu dinare at a intrare in sas càscias de s’istitutu sena istrubbos de presentare  partetzipare a bandos e garas, ma est perfetamente legale chèrfidu dae una lege de su Cussìgiu Regionale. Esatamente su totu aferit a su capìtulu SC 03.0350 – Contributo per la gestione e l’attività istituzionale dell’Istituto Cammillo Bellieni di Sassari cun cobertura a norma de s ‘art. 9, comma 10 lett. M), L.R. 7 agosto 2009, n.3, articolo 1, comma 20, Legge Regionale 19 gennaio 2011, n.1 art. 1, comma 9, della legge finanziari 2015).

A nàrrere sa beridade ocannu custos provedimentos de assegnatzione direta de sos fundos sos giornales los ant iscobiados e cuntestados ca, in tempus de crisi, non paret pretzisu chi su Cussìgiu Regionale pòngiat dinare gasi a discretzione pro entes, sòtzios, istitutos e benefitziàrios giai individuados in sa lege. Duncas sena colare dae unu bandu pùblicu, o cuncursu o gara. No est giustu pro cussos chi imbetzes depent sighire àteras protzeduras. Però s’interventu a su Bellieni fiat abarradu cuadu ca no est una lege noa chi si depet iscrìere in sa finantziària, ma una medida de annoare cun s’ allegadu tècnicu de bilantzu. E duncas non “visibile” dae sos atos prus a craru, ma presente in sos atos de su Cussìgiu.

Semper cando però est mègius acrarire chi no est un’ispesa obligatòria. Su de pònnere su dinare o no in su capìtulu est unu sèberu polìticu chi si faghet cada annu. E ocannu sa polìtica l’at fatu. De seguru non b’intrat nudda su fatu chi, a pustis de sas eletziones, su professore de Bono siat coladu dae su Partidu Sardu derrutu (in su cale aiat militadu una vida e chi l’aiait fatu sa norma) a su fronte soberanista binchidore chi como guvernat in Regione cun Pigliaru. Unu brincu dae Cappellacci a sa Manca fatu cun sabidoria e a su momentu giustu. E giustamente premiadu.

Dade atentu: pro su dinare postu est totu legale o regolare, ma de seguru si podet criticare una manera discutìbile de destinare su dinare pùblicu a privados. Pro ite intamen non l’ant dadu a sa Provìntzia de Nùgoro e a sos operadores suos?

Pro sa limba sarda s’est istantziadu pagu e nudda. Prus pagu de 2 miliones de èuros. Su 0.025 pro chentu de su bilantzu intreu de sa Regione. Sa Die est sena fundos, nudda a su Curretore Ortogràficu, nudda a sas tradutziones, nudda a sa promotzione de sa LSC. Su pagu chi ant postu pro iscola e ufìtzios non nde istorrat su fatu chi ocannu su sardu est isparidu dae sas iscolas e sos ufìtzios sunt serrende. E non nde istorrat su dinare mutzadu s’annu coladu.  Ma de totu custu a su professore Pinna-Bellieni pagu nde li importat ca depet acumprire sa funtzione sua de cantore in alabàntzia de sa Giunta chi est resessida a frimmare sa polìtica linguìstica ma non sas leges “ad istitutum” e “ad personam”.

Ma in totu custu degollu sa Regione agatat 50 mìgia èuros e los dat s’Istitutu Bellieni e sena pònnere in contu ca forsis b’aiat cosas prus urgentes? Pro ite? Sa cajone l’amus cumpresa totus.

 

P.S.

In s’artìculu de La Nuova Sardegna Pinna est resessidu a non mentovare mai s’assessora e no est una cosa fata de badas. Deo no mi dia a fidare de unu gasi, sennora Firino. Nde isco carchi cosa.

 

https://salimbasarda.net/politica-linguistica/sa-coerentzia-ad-personam-de-micheli-pinna/

https://salimbasarda.net/politica-linguistica/a-caddu-tocadu-sa-delicadesa-de-micheli-pinna/

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *