A pustis de duos meses colados dae Pedro Sanchez (segretàriu de sos sotzialistas ispanniolos) e dae Carles Puigdemont (ghia de sos indipendentistas catalanos de tzentru dereta de Junts per Catalunya) a si pònnere de acordu, sos duos polìticos ant decraradu de àere agatadu sa solutzione pro fraigare su guvernu ispanniolu nou. At a èssere unu de minoria sustènnidu dae fora dae sos bascos de Bildu e dae sa manca ispanniola.
Su patu, firmadu in Bruxelles, impinnat sos sotzialistas ispanniolos a dare s’amnistia a cale si siat polìticu chi at ammanigiadu su referendum de su 2017 pro s’indipendèntzia de sa Catalugna. In custa manera sos chi sunt cundennados e sos chi sunt galu a protzessu ant a èssere lìberos luego. Sa medida Sanchez l’aiat decrarada prus de duos annos a como, ma posca non nd’aiat fatu nudda (nd’amus iscritu inoghe). Custa borta su tempus fiat agiudende Piugdemont: s’iscadèntzia pro no andare torra a eletziones noas est su 27 de santandria e prus andaiant a dae in antis custas arresonadas, prus s’arriscu s’acurtziaiat. Su sentidu de ispanniolos maicantos est chi sos chi ant bìnchidu sunt sos indipendentistas, chi in custa manera leant poderiu e a su matessi tempus renessent a nde bogare a fora dae presone sos ativistas issoro.
Dae chidas, difatis, su Partido Popular at ammanigiadu manifestatziones in tzitades diferentes pro si chesciare de sa possibilidade de custu acordu. A s’inghitzu sunt istadas totu cantas chietas e non si sunt atapadas contra a sa politzia. Dae carchi dies, però, in sas manifestatziones si sunt annantos sos neo-nazistas de VOX. Issos ant artziadu de meda sa tensione e sunt incomintzadas sas violèntzias. Martis sos fertos fiant 39 e eris una manifestatzione at triuladu a Madrid. Sa dereta est timende chi su perdonu a sos catalanos los agiudet in su camminu issoro de autodeterminatzione. In su matessi tempus est acusende Sanchez de cuncambiare sa carriera politica sua cun s’unidade de s’Istadu, andende contra a sa Costitutzione.
Gabriele Tanda
Leave a comment