Intervista a Nevina Satta, Diretora de sa Sardegna Film Commission

Intervista a Nevina Satta, Diretora de sa Sardegna Film Commission

In s’artìculu de chenàbura colada, amus faeddadu de sa Sardegna Film Commission. Amus ispricadu ite est, ite faghet e su rolu chi tenet in su fràigu de una fàbrica difìtzile comente su tzìnema in Sardigna: sos resurtados sunt meda e de importu. Oe chistionamus in sardu cun sa Diretora de sa Sardegna Film Commission, Nevina Satta, de su benidore de sa fundatzione e de sas dificultades chi est colende su tzìnema pro neghe de su Covid19.

Fèmina nugoresa e professionista de primore, ses istada disterrada pro tempus meda in Los Angeles. Cale sunt istadas sas àndalas chi t’ant fatu ghirare in Sardigna? Comente est crèschida sa Sardegna Film Commission?

Apo traballadu pro tempus meda in Hollywod intro sas produtziones e apo insingiadu in s’universidade, ma cando apo lèghidu su bandu de sa fundatzione de sa Sardegna Film Commission, mi si nche est alluta una lughe e m’apo naradu: est unu machine ma bi proo. E aio resone! Cando so arribada in Sardigna totus mi pompiaiant male, ca deo benia dae un’àteru mundu chi at unu modu de fàghere lìberu de a beru, ca est avesadu a unu mercadu difìtzile meda comente cussu americanu. Ma amus fatu iscuadra e sas cosas sunt andende bene. A s’incumintzu sa Sardegna Film Commission fiat pensada comente un’isportellu pro pedire dinare, a pustis est divènnida, gràtzias finas a sa Regione, unu traste pro progetare sas cosas de fàghere pro agiudare sa cultura e su tzìnema. Amus dèvidu fraigare unu sistema dae nou pro intritzare e agatare professionistas, ma a bellu a bellu bi semus resessende. Sa punna nostra est de batire su mundu in Sardigna e sa Sardigna in su mundu.

Cale sunt istadas una dificultade e una satisfatzione de custu traballu?

De dificultade nde sunt capitadas, ma sa prus curiosa est una. Nois semus unu servìtziu in donu, sa punna nostra est de agiudare su tzìnema in Sardigna, ma gente meda, mescamente a s’incumintzu, non nos at dadu fide. Non bi creiant chi faghimus totu in donu. (riet) Sa satisfatzione prus manna est chi como sunt traballende inoghe gente de gabbale dae totu su mundu, e finas chi sardos de primore sunt ghirados a Sardigna.

Tue ses istada in mesu mundu, ma faeddas e mantenes in coro sa limba sarda. Meda gente pensat chi siat un’istorbu a ischire e impreare sa limba nostra e chi non serbit a nudda. Sa fundatzione, finas acumpangende fèstival comente Babel ammanigiadu dae sa Società umanitaria, mustrat chi non est gasi. Ite nde pensas de su sardu in su tzìnema?

As naradu bene, su sardu est sa limba de su coro. Sa limba non est abba, e fintzas gràtzias a mama l’apo imparada a fìgia mia: como faeddat inglesu, italianu e sardu. In Sardigna non si resesset a cumprèndere bene chi sa limba nostra est una richesa. Cussos chi si nde abbìgiant prima sunt sos istràngios. Pro nàrrere: fìamus faghende unu bìsita cun regista pro unu film in Mamujada e àteras biddas de sa Barbàgia. Ant chèrfidu unu tradutore dae su sardu, ca fiant ispantados de sa bellesa sua e ant detzisu de istichire su sardu in sa pellìcula.

Custos sunt annos chi bident sa nàschida e sa crèschida de giassos in sa retza eletrònica in ue si podent bìdere pellìculas e sèries televisivas, comente Netflix e Amazon Prime. Cale sunt sas possibilidades noas? Comente si nche est insertende sa fundatzione?

De possibilidade bi nde sunt medas. Ma depimus imparare a pompiare a cussu chi faghent sos logos chi nos assimìgiant: s’Irlanda, Malta e Tzipru pro esempru. E cun custos proare a fàghere retza, cumprèndere sas carreras prus bonas pro megiorare e agatare fundos e dinari dae batire inoghe pro agiudare su tzìnema sardu. No at sensu perunu proare a fàghere comente faghent a Roma chi tenet una fàbrica de su tzìnema manna.
Semus un’ìsula chi in die de como est a dae in antis in cosas comente s’informàtica: Tìscali est nàschida dae meda e inoghe bi sunt aziendas chi traballant in cussu mundu. Ma non resessimus a la contare a fora.

In custa disaura manna chi est su Covid19, su tzìnema e sos traballadores de su ramu sunt firmos. A su matessi tempus totu sa gente in domo est bidende prus medas pellìculas e sèries. Comente si sunt moende sos entes e sas produtziones de su mundu? In Sardigna e in Itàlia bi sunt noas de importu?

Amus ammanigiadu cun Netflix e Itàlia Film Commission unu agiudu pro sos traballadores prus dèbiles de su tzìnema: mescamente totus sos tècnicos. Un’àtera cosa chi semus fatende est de ammustrare pellìculas sardas in carreras, projetende•las in sos muros de sas biddas e de sas tzitade. Ca sos sardos non connoschent gasi meda su tzìnema sardu. Una cosa chi semus fatende como est de traballare e de non nos firmare, ca gasi tzucamus luego cando custu virus at a agabbare.

S’àtera chida fiat sa die de sa terra chi nos ammentat chi s’àtera emergèntzia est sa brutura chi b’est in sa natura e s’ismànniu de sas temperaduras. Sa Sardegna Film Commission, dae su 2014, s’est posta regulas pro brutare de mancu e pro fàghere produtziones sustenìbiles. Comente est andende a dae in antis custa punna?

Nois non semus inoghe ca b’est logu, amus de amparare su mundu pro sos chi ant a bènnere e no pro sa natura ebbia, ma finas pro sa memòria sotziale. Su tzìnema podet agiudare a mudare pensos subra su chi faghimus a fitianu. Pro sa die de sa terra amus postu in donu in sa retza pellìculas e libros pro pitzinnos chi faeddant de natura e de maneras bonas de si cumportare. Intro de issos b’est su benidore nostru.

Gabriele Tanda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *