Sa Sardegna Film Commission est una fundatzione nàschida pro agiudare su tzìnema in Sardigna. Cust’arte est belle che una fàbrica: cun gente meda chi bi traballat e cun trastes mannos a tràvigu dae unu logu a s’àteru. No est una faina fàtzile a la fàghere e tando bisòngiat de agatare investimentos mannos de dinare, ma finas giùghere capatzidade de ammanigiare. Si unu pro bènnere inoghe a girare pellìculas est custrintu a si nche batire totu cantu, finas persones chi ischint traballare, non bi la faghet: comente est costadu a Santu Sarvadore a curtzu a Cabras in su western de sos annos Sessantas. Si bi sunt sos trastes e sos professionistas inoghe sas cosas però sunt diferentes, ma tando mescamente a sos traballadores est pretzisu a li dare formatzione e traballu fitianu: custa est una de sas punnas de sa fundatzione in paris cun sa Regione.
Onni pellìcula ponet a cùrrere a su nessi un’otantina de persones. A custa gente b’est unu mundu ligadu chi creschet cun issos, comente osteras e posadas. In prus su logu si faghet a connòschere dae cussos chi bident sa pellìcula e li podet pònnere curiosidade: gasi creschet su turismu chi cheret cumprèndere e iscobèrrere de a beru s’ìsula nostra. Dificultades non nde mancant, prima de totu agatare dinare pro sas ideas chi naschent inoghe, e pro cussu sa fundatzione est agiudada dae sa Regione, dae s’Itàlia e dae sa Comunidade Europea. Ma mescamente proare a fàghere bènnere dae nois produtziones chi podent seberare àteros oros de su Mediterràneu: sa Sardegna Film Commission s’impinnat a las cumbìnchere in Europa e in su mundu, e proat a bìnchere unu disafiu cun natziones chi s’assimìgiant a nois, comente a Malta e a sa Croàtzia. Sa calidade bona de sa Sardigna est sa variedade de sos logos: mare – chi ischimus chi agradat – ma finas montes de diferente genia, domos de cada casta, monumentos, padentes e finas pràgias chi parent desertos.
Ma non sunt sos logos ebbia: sa Sardigna tenet culturas e limbas chi podent serbire pro megiorare unu contu, pro bi annànghere unu sensu de prus. Est craru chi totu custas calidades sunt bonas pro sos angenos, ma sunt de fundamentu pro chie faghet tzìnema in Sardigna. Sunt famados sos documentàrios – de unu nde amus giai faeddadu inoghe (https://salimbasarda.net/a-bolu-unu-film-a-cuncordu/) – e de contos si nde podent bogare milli e prus. In custu mundu sa limba sarda tenet unu tretu suo, pro esempru, gràtzias a issa onni annu in Casteddu b’est su Babel film fèstival, unu cuncursu pro chie contat sas limbas de minorias. Est pro more de custa richesa manna chi como est ismanniende su nùmeru de sas pellìculas e de sos registas sardos: ideas non bi nde mancant, e non dae como. Cussu chi mancaiat fiat un’agiudu pro fàghere abarrare inoghe, e finas torrare, sos traballadores de primore, ma non bi fiat nemmancu un’istrutura chi podiat tèssere sa retza intra de sos professionistas e finas cun chie tenet dinare. Sa Sardegna Film Commission si nche est leadu custu rolu.
Ma non b’est de atuare petzi a su tzìnema. In Sardigna sunt creschende sas animatziones e sos video giogos, duos mundos chi sunt capatzes de mòere dinari e bisos. Ma pro non fàghere fuire chi at s’ischire bisòngiat de acumpangiare sos noitzolos, fraigare istruturas de giudu e ocasiones de traballu. Est custu chi sa Sardegna Film Commission faghet: agiudat sas ideas a crèschere pro fraigare una fàbrica de gabbale, chi a bellu a bellu potzat andare a dae in anti dae issa matessi.
Fintzas a pagu tempus a como sa Sardigna non fiat contada in sa giusta manera. Tantu chi sos funtzionàrios italianos beniant inoghe pro cundenna, e sa cultura nostra fiat menispressiada comente cosa de un’antigòriu lègiu e malu. Primitivos in una terra sena nudda, fiamus pro sos istràngios. A su revessu nois innamorados fatos de sa cultura nostra e de sa Sardigna. Mai comente a prima, como amus sa possibilidade de tramudare sas ideas de sos àteros e de contare dae nou, e comente cherimus nois, sa Sardigna.
Gabriele Tanda
Leave a comment