Si narat a s’ispissu chi su sardu non tenet una rapresentàntzia in sos mèdia mannos, dae oe in Netflix b’at a èssere unu documentàriu dae s’inghitzu a s’agabbu in limba sarda: A bolu. Nde amus giai faeddadu de custu film (inoghe) chi contat diferentes tenores sardos in sas biddas issoro. Un’òpera de gabbale chi resesset a ammustrare unu modu de bìvere sa poesia e su cantu traditzionale sena rùere in folklorismos. Como su biàgiu suo est supridu in unu giassu de importu mannu.
Su cantu a tenore est intradu dae carchi annu in su patrimòniu immateriale de s’umanidade de s’UNESCO, ma in pagos lu connoschent de a beru e ischint ite mundu b’at a dae segus: sas istòrias e sas resones de chie lu mantenet biu, sas modas e sos giassos chi lu influentzant. S’oportunidade est manna pro sa limba e sa cultura sarda e bisòngiat de la sustennere, ca si andat bene, in Netflix àteras òperas in sardu ant a leare unu giassu issoro.
Gabriele Tanda
Leave a comment