Cando si faeddat de artes martziales si podet pensare chi sunt maneras istranas e eficatzes pro magiare. Cussas prus noas podent fintzas èssere gasi, ma sas prus antigas e traditzionales sunt meda de prus. Intro a unu modu de iscùdere unu pùngiu bi podent èssere sèculos de istòria, de cultura e finamentas de pessu religiosu. Su Kung Fu in Tzina est gasi: unu sistema de tècnicas pro addobbare calicunu, ma finas pro si cuntzentrare e pro intrare in cuncordu cun su corpus. Medas regiones de s’Oriente ant un’istile tot’issoro de cumbatare chi si cunforma a su logu e sos trastos de su traballu tìpicu de cada zona.
Tando fàghere un’arte martziale non est comente fàghere unu cale si siat isport. Cheret nàrrere intrare in un’àtera sotziedade, istudiare una cultura, un’istòria, unu logu e connòschere finas persones diferentes. Giùghere rispetu de su rolu de su mastru ca est isse chi ischit sos segretos de sas mòvidas giustas, est isse chi ghiat su dischente in s’àndala de sa connoschèntzia de cussu mundu: s’autoridade est de importu mannu, ma non est ligada a sa fortza, ma a sa sabiesa de chie insìngiat. Su mastru famadu paret su mannu sardu de tempos colados, chi faeddaiat pagu e medende cun aficu paràulas e atziones. Duncas fàghere artes martziales est comente fraigare unu ponte intre oros de sa Terra a tesu meda.
In su sud de sa Tzina est nàschidu, sèculos a como su Wing chun kuen, chi bortadu cheret nàrrere pugiladu de su beranu eternu, un’arte martziale fìgia de su Kung Fu chi impreat mescamente sos pùngios e sas defensas de manu. Chie gherrat in custu modu est a curtzu de s’inimigu e, cun lestresa meda, proat a lu iscùdere. In sa modernidade cust’arte tzinesa, tìpica de sa zona de Hong Kong, est divènnida famada pro more de Bruce Lee e de su mastru suo Yip Man. Su primu at impitadu su Wing chun pro fraigare su modu suo de batalliare, su Jeet Kune Do, ammisturende àteras artes e traditziones. Su segundu, imbetzes, at ispartu un’arte chi fiat pro pagos seberados ebbia. Unu sèmene chi est lòmpidu finas in Sardigna e no dae oe.
In s’ìsula nostra finas a s’annu coladu onni assòtziu de custa arte martziale fiat in pare cun àteros entes italianos, ma dae s’agabbu se su 2019 est nàschida sa Sardigna wing chun, sa federatzione sarda de cust’isport (https://sardignawingchun.wordpress.com/). Semus arresonende de una criadura chi tenet un’annu nemmancu, ma fintzas gasi tenet giai unu pagu de atletas e est chistionende cun àteros sòtzios minores pro s’ismanniare. S’idea est crèschida dae Alessandro Moro chi est unu mastru giòvanu ma espertu meda, chi at biagiadu in Hong Kong e at addobiadu e istudiadu cun sos mastros prus de gabbale, cun unu de custos, Sam Lau, at istrintu unu ligàmene forte. Como sunt ammanigende campionados e garas, e ant gana de crèschere finas comente istitutzione culturale: ordingiande bursas de istùdiu pro andare in Hong Kong. Unu filu isboligadu intre duas ìsulas a tesu meda chi s’assimìgiant, ca sas artes martziales non sunt petzi isport, ma unu ponte intre duas maneras de bìvere e bìdere su mundu.
Gabriele Tanda
Leave a comment