Vitòria Snp, s’Iscòtzia conca a su segundu referendum

Vitòria Snp, s’Iscòtzia conca a su segundu referendum

Est galu chitzo pro ischire si sa Union jack at a pèrdere su colore biatu a pustis de sos 64 iscrannos conchistados dae su Partidu natzionale iscotzesu. Bi nde cheriant 65 pro sa majoria assoluta, ma a favore de su referendum bi sunt finamentas sos Birdes chi nd’ant conchistadu 8. E chi sunt prontos a guvernare in pare cun Sturgeon. Cun sa punna de nche bogare sa natzione dae su covid in antis e dae s’Uk a pustis.

Su Snp at bìnchidu in belle totu s’Iscòtzia. A sos Cunservadores petzi 5 cullègios (31 iscrannos), 4 a sos Liberal-democràticos (4 iscrannos) e 2 a sos Laburistas (22 iscrannos).

«Est custa sa voluntade de su Paisu – at naradu sa binchidora Nicola Sturgeon, prima ministra uscente e ghia de su Snp post Salmond –. E cunforma a custu resurtadu non b’at giustificatzione democràtica peruna pro Boris Johnson o pro chie si siat chirchet de blocare su deretu de su pòpulu iscotzesu de si seberare su benidore suo. Lassade chi bos lu nàrgia a craru. Si sos cunservadores b’ant a proare non s’ant a pònnere contra a su Snp ebbia ma a sa voluntade de su pòpulu iscotzesu intreu. Amus a mustrare, a concruos, chi su Rennu unidu no est un’assòtziu intre aguales e chi Westminster no lu bidet prus comente una unione voluntària de natziones».

Perunu iscrannu pro Alba, su partidu personale de Alex Salmond chi, pro mèdiu de sa lege eletorale atuale (fiant duas sas ischedas) cheriat lòmpere a una super majoria indipendentista. Sos faeddos de s’ex primu ministru sunt unu disafiu meru e sìncheru indiritzadu a sos ex cumpàngios: «Parabenes a Nicola pro custa vitòria ma, craru, vitòria cheret nàrrere responsabilidade. Su guvernu Snp imbeniente cheret chi mantèngiat sa promissa de nche giùghere s’Iscòtzia a s’indipendèntzia. E non b’at còntigas pro no lu fàghere».

màuru piredda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *