«Sa situatzione est prus chi non dinàmica. E lu est ca non semus a tretu de lu controllare a custu virus». A lu nàrrere est Maria Van Kerkhove, epidemiòloga americana incarrigada dae s’Oms pro sa gestione de sa pandemia. Comente a nàrrere chi non giuat a nos bantzigaremus. Faeddos pronuntziados pagas dies a como movende dae sos datos de sa chida colada, cun 3,1 milliones de cuntàgios noos e 54mìgia mortos. «In unas cantas tzitades b’at ospidales prenos e gente chi si nche morit cando chi peri sas carreras b’at chie si cumportat che chi s’epidemia esseret acabbada», at annantu. Ogetu se istùdiu de s’Oms est s’evolutzione de su virus in sos 18 meses imbenientes. «B’at grupos umanos intreos galu a si vatzinare. O ca non bi lompent, o ca los refudant, o ca no lu podent retzire. De custa manera b’at possibilidade manna chi essant a campu focolajos noos». A bisu de Van Kerkhove, mancari resessende a lu controllare unu cras, no amus a resèssere a nche l’ispèrdere a custu virus. «Custa possibilidade nche l’amus pèrdida a comintzu ca no l’amus atacadu a manera dèghida a livellu globale».
màuru piredda / imàgine Ansa
Leave a comment