Su perìgulu pro sa salude de sos Vìgiles de su Fogu est in sas divisas issoro. Sa dibata pro custu arriscu, ligadu a s’espositzione a sustàntzias chi podent fàghere male, arribat dae sa polìtica. Su Movimentu 5 Isteddos at presentadu una motzione, firmada primu de totus dae su cabugrupu Michele Ciusa, pro pedire a su guvernu de introdùere cuntrollos prus istrintos e tutelas ispetzìficas pro sa categoria.
Sas finalidades sunt duas: afortigare sa preventzione peri programas de biomonitoràgiu e otènnere su reconnoschimentu de s’atividade de sos Vìgiles de su Fogu comente traballu usurante. In su tzentru de sa chistione bi sunt sos Pfas, sustàntzias chìmicas (presentes fintzas in materiales comente su Teflon) impreadas in sas bestimentas de traballu pro sas propiedades idro-repellentes e ignìfugas chi tenent. «Sas divisas sunt progetadas pro si bardiare dae sas fiamas e dae sas tossinas, ma podent cuare unu perìgulu malu», at naradu Ciusa.
Segundu chircas pubblicadas in Environmental Science & Technology, sos Pfas, si sunt postos a curtzu de temperaduras artas e impreados pro tempus meda, podent èssere intzupidos dae sa pedde e passare a s’organismu, faghende dannu a sos mecanìsmos de defensa tzellulare e faghende crèschere su perìgulu de maladias oncològicas. Sa literadura sientìfica assòtziat difatis s’espositzione a custas sustàntzias a patologias graves: tumores a sos butones, mesotelioma, linfoma non Hodgkin e carcinoma prostàticu, e in prus a maladias de sa tiroide, de su coro e de sos vasos sanguìneos (cardiovasculares) e ipertensione.
In su mentres chi, in sos Istados Unidos su tema est giai ogetu de screening e atziones legales contra sos produtores, in Itàlia mancat galu unu cuadru istruturadu de analisis epidemiològicas. Sa motzione impinnat duncas sa Giunta regionale a faeddare cun su Guvernu pro annànghere cuntrollos ispetzìficos in sas vìsitas de meighina de su traballu e dare passu a totus sas protzeduras netzessàrias pro su reconnoschimentu de sos perìgulos artos. «Sa salude de sos Vìgiles de su Fogu depet intrare a èssere una prioridade cuncreta», concluit Ciusa –. No est prus tempus de rinbios, serbint preventzione e tutelas pro chie ponet in perìgulu sa vida cada die».
(foto de www.vigilfuoco.it)
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment