Sa Corte suprema de sos Istados unidos, cun ses votos a favore e tres contràrios, su disinnu suo l’at pigadu. Sa sentèntzia de su 1973 in contu de deretu a s’istrumada est abolida. Dae como in susu sos istados sìngulos sunt lìberos de aplicare sas leges issoro pro su chi pertocat sa matèria. Custu cheret nàrrere chi s’interrutzione voluntària no est prus garantida a livellu federale custringhende sas fèminas chi cherent ricùrrere a cussu deretu a nche cròmpere a àteros istados chi lu permitint. Duncas, at a èssere prus difìtzile (cando no impossìbile) pro chie no at a pòdere. “Pro life is a Lie, they don’t care if people die!” (Pro-vida est una fàula, non nde lis afutit si bi morit gente) est unu intre sos islogan in custas dies de protestas chi sunt animende sas carreras e sas pratzas de Amèrica. Su disinnu de sa Corte agradat a Trump (tres giùighes sunt de nòmina sua) e a sos setores clèrico-reatzionàrios peri su mundu. Agradat pro seguru a sos putinianos de sa III Roma e ponet in pensamentu sos atlantistas chi como carchi cosa l’ant a dèvere nàrrere a pustis de su mudìmene issoro pro su matessi assentu reatzionàriu in Polònia (una pregadoria bi cheret finamentas pro sos chi pensant chi in Rùssia bi siat galu Alexandra Kollontaij ministra). Ma sa chistione de s’istrumada est in su matessi tempus una batalla pro su deretu de s’autodeterminatzione feminile e pro su deretu a una sanidade giusta e democràtica a beru. Sos setores democràticos de su poderiu Usa, comintzende dae su presidente Biden, no ant promòvere mai una sanidade pùblica pro chi chie si siat si potzat permìtere sas curas. Sos produtores farmatzèuticos e sos asseguradores sanitàrios chi l’ant finantziadu sa campagna eletorale non bi l’ant a permìtere, mancari cherende. Ca cherende aiat pòdidu nàrrere chi emmo a sa prataforma sanitària de Bernie Sanders (chi, mancu a lu nàrrere, non nd’at retzidu de cussu dinare pro sa campagna sua). Duncas, pro chi sa batalla pro su deretu como negadu a livellu federale non siat unu disafiu eletorale ebbia intre Trump e Biden, cheret chi sos chi sunt protestende diant vida a unu movimentu de massa e indipendente pro nch’insertare sa chistione ispetzìfica in intro de una prataforma sanitària pùblica prus generale.
màuru piredda
Leave a comment