Unu vatzinu pro sa comunicatzione

Unu vatzinu pro sa comunicatzione

Narat Enrico Bucci in su “Foglio” chi, in mancàntzia de datos cumpletos in contu de ispainada virale, su de sa mortalidade est unu de is paràmetros «prus istàbiles e fidados pro cumprèndere ite ddoe at capitende». Eris in Sardigna b’at mortu 10 persones, chenàbura 13, gioja àteras 10, mèrcuris 15, martis 14, lunis 8, domìniga colada 11. In sete dies 81 tzitadinos sardos si sunt rèndidos pro more de su virus. Est craru chi, mancari galu tintos a grogu, «ddoe at capitende» unu disacatu. S’impreu de is àteros datos ebbia nos presentat, imbetzes, unu bàntzigu narrativu comente unu ferru chi, oe de punta, oe de atza, oe de prus, oe de mancu, sighit a ispurpare carenas cognitivas avesadas a s’istatìstica priva de sentidu e a unu nùmeru de detzessos chi non nos diat dèvere lassare gasi sulenos. In intro de custa guarnissa s’atzione polìtico-sanitària pro nos nch’istesiare dae sa maladia si fùrriat su bonu de is bortas a atzione comunicativa chi, a dolu mannu, nos nch’istèsiat dae sa cumprensione de sa realidade.

de Màuru Piredda

Prima chistione, su vatzinu. A comintzos de annu est essida sa noa de su mèigu positivu a pustis de sa prima dose de Pfizer. Sa cosa, dende·nos·la a ischire, dd’ant contada comente chi cussu resurtu esseret istadu cosa impossìbile. Una noa sena sentidu perunu a dae chi sas inoculatziones devent èssere duas, e a dae chi tocat a isetare una chida a pustis de sa segunda dose. Ma a custa comunicatzione fartosa, comente ant rispostu is autoridades? Franco Locatelli (presidente de su Consìgiu superiore de sanidade) at naradu chi «s’amparu immunitàriu dae s’infetzione est cumpletu petzi a pustis de sa segunda dose de vatzinu». Diamus chèrrere nàrrere “acabonu mannu”, ca sa risposta 11 de sas faq est prus chi non cautelosa: «Mancari siat plausìbile chi su vatzinu amparet dae s’infetzione, is vatzinados e is persones a costàgiu issoro devent sighire a adotare sas medidas de protetzione anti Covid-19». Duncas no amparu «cumpletu», comente narat Locatelli, ma «plausìbile», comente leghimus in su prospetu de su vatzinu. E, isperende finamentas chi su 95% siat 95% a beru, no est una diferèntzia de pagu.

Segunda chistione, sos test ràpidos. Inoghe tocat de cumprèndere si sos test antigènicos de “Sardi e sicuri” sunt is pròpios chi Crisanti crìticat in Vènetu. In antis de nche lòmpere a Sardigna, su professore si los at semper abbaidados a perra torta ca nât chi non fiant seguros. Peus: inatendìbiles. In su Corriere del Veneto de su 30 de santugaine – faeddos suos – leghimus chi «s’atendibilidade issoro nch’est intre su 20 e su 49%. Est pro custu chi in autotutela no apo a firmare prus sos refertos negativos ma petzi sos positivos ca a pustis b’est su tampone moleculare chi cunfirmat». Pagas dies a como, s’11 de ghennàrgiu, semper chistionende de Vènetu e semper contra a Zaia, Crisanti at repìtidu (Open) chi «cada deghe test, tres sunt negativos farsos». Tando pro ite inoghe andant bene?

Sa de tres chistiones est ligada a sa segunda. Sos positivos farsos de s’Ogiastra, primu logu interessadu dae sa mapadura regionale ghiada dae Crisanti. Ite at naradu Massimo Temussi, cummissàriu Ares-Ats? Chi «su tampone antigènicu tenet una pertzentuale de atendibilidade de intre su 60 e su 70%, ma cando su resurtu est negativu peruna duda b’at» (Unione Sarda de su 15). Duncas dae custos test essint a campu petzi positivos, pagos positivos farsos e nemmancu unu negativu farsu. Duncas non ddoe at negativos farsos in libertade? S’ùrtima chistione, fintzas custa ligada a sos test, pertocat sa marca. Sunt is pròpios chi ant proibidu in Frantza (pro sa chistione de sos positivos farsos), est a nàrrere sos VivaDias? A bisu de Temussi nono, a bisu de Sardiniapost emmo.

Forsis diat èssere lòmpida s’ora de una comunicatzione prus crara. Pro seguru Locatelli, Crisanti e Temussi ant a ischire articulare sas resones issoro cara a nois osservadores e cara a sas dudas nostras. Ma si a como mannu est s’abbolotu in suta de sas àeras, sa situatzione no est de sas mègius. A su presente s’ùnicu parametru istàbile e fidadu, pro torrare a Bucci, est su de is mortos. Cantos ant a èssere oe?

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *