Dae sa domìniga colada (3 de ghennàrgiu) in Rai3 est inghitzadu Adrià beni cun me! (inoghe unu assàgiu). Unu programma in ses puntadas (cada domìniga a sas noe e mesu) chi andat a iscobèrrere sas limbas de Sardigna: dae su catalanu de s’Alighera a su tabarchinu de s’ìsula de Santu Pedru, colende pro su gadduresu, su turritanu e, a manera òvia, su sardu. Chie lu ghiat est Adrià Martìn unu professore de s’Universidade de Bartzellona e de s’Universidade de Casteddu, chi est fintzas un’espertu de tecnologias pro sa bortadura e chi at fraigadu cun àteros Sardware.
Sa punna de su programma, produidu da Terra de punt, est de dare visibilidade a sas limbas nàschidas in s’ìsula nostra e chi s’UNESCO at decraradu in arriscu de discumpàrrere luego. Martìn si tzucat cun unu furgone pro addobiare persones e eventos in ue si faeddant custos idiomas, proende a cumprèndere su raportu cun issos de chie los faeddant, ma finas sa resone pro ite sa gente est birgongiosa de los impitare e, in su mentres, fatende•los ascurtare a sos ispetadores.
In prus Adrià ammustrat sos impreos artìsticos chi si nde podet fàghere. Difatis su biàgiu de Adrià beni cun me! tenet iscutas in ue su ghiadore cantat in paris cun musitzistas e cantadores sardos, comente Claudio Gabriel Sanna e Dr. Drer, su primu aligheresu e su segundu casteddaju. Sas mùsicas de su programma sunt iscritas dae isse etotu chi las at incungiadas in unu discu Lo somrìs de la magrana (inoghe).
Tando a custa domìniga a sas noe e mesu de mangianu pro biagiare cun Adrià Martìn in sas limbas de Sardigna.
Gabriele Tanda
Leave a comment