de Maurizio Sale
In Durgali tenimus unu ditzu chi paret sestadu pro ispibillare custos cronistas isportivos chi mesurant totu cun su metru de su fùbalu.
Acò, custu est : “Unta e sizi!”.
Diat èssere a nàrrere “Unta·ti sa cadena e pone·mi in fatu si bi resesses!”
Unos cantos cronistas, oe finas cussos de su Fatto Quotidiano, ant iscritu chi sa Astana, s’iscuadra de Bissente Nìbali, non si siat cumportada segundu su “fair play”, cando, aende ischidu de sa rutòrgia de Contador e chi forsis non diat èssere istadu in cunditziones de torrare a pigare, apat atacadu a tirare semper prus a forte pro no li permìtere de nche los segudare e duncas de los pònnere in dificultade.
Ma no est beru, nudda. Ma ite semus narende? Cando b’at una gara si punnat pro la bìnchere , non pro la pèrdere. Ello? Ite deviant fàghere sos de s’iscuadra de Nìbali , si deviant forsis sètzere in sa cuneta a isetare? Ajò chirchemus de èssere un’agigu professionales dende sas novas. Custos non sunt noranta minutos de fùbalu, cun totu sos minutos de agiunta e cando unu ruet sos àteros nche ghetant sa botza a foras dae su campu pro rispetu. Finas ca in su campu sos giogadores si bident s’unu cun s’àteru e podent duncas bìdere su chi est acontessende·li e disinnare duncas de si firmare pro isetare sos sucursos e cosas gasi. Una cursa tziclìstica , mesches che a su Giru de Frantza, cun bintunu tapas massacrantes, oras e oras subra sa sedda, die pro die, chilòmetros in fatu de chilòmetros siat in logu paris, siat a puntu in susu, non si podet pretèndere su matessi cumportamentu de una partzida de fùbalu. Sas trempas si nche superant cun sas dentes,a bias de sa multìplica a bias sas de buca. E sa buca si nche sicat e gasi sa limba e in tames sa gula, cando su curridore disinnat a iscatare e a li proare sos chircos a sa britzicheta e sos costàgios a s’aversàriu. Ite nd’ischides bois si non bidides àteru chi non botza , carches a serras de anca e bulletinos grogos e rujos?
Sos giornales chi non tenent una lìnia dislindada pro su tziclismu tendent totus a fàghere cumparàntzias de custa genia farsende totu su sentidu chi est a rodeu in su mundu de sos amantiosos de su pedale e de su manùbriu allorigheddadu. S’ispìritu est diferente meda, sa tècnica e mesches sa tàtica non s’assimìgiant pro nudda e duncas unu giornalista diat dèvere lassare a un’ala custos paragones. In prus apo lèghidu chi, e custu est su chi mi dat prus anneu, si a bortas Nìbali diat bìnchere su Tour nà chi non diat pòdere àere su matessi sabore chi diat àere àpidu si fiant istados galu in cursa Froome e Contador.
Acò e su chi, unas cantas dies a como, at fatu Nìbali subra su “pavè” , ismentigadu bos nche l’ais?
E tando como Bissente diat dèvere pensare petzi a nche cròmpere a primu a Parigi.
E a bois,cronistas istimados, dia dedicare, si a bortas bos diat bènnere a conca a sighire a bogare ispùtzias, su tzascu nòdidu durgalesu: “Untade e sighide!”
E sa botza lassade·nche·la in domo cada tantu!
A su nessi cando disinnades a allegare de tziclismu. Ca cussu isport, cun totu su fragu de chìmica chi giughet in fatu,est galu capatzu de nche mòvere finas su coro prus àrridu e tracheddaditzu!
Foto leada dae sa retza
Leave a comment