Una pelea chi nch’est acabbada cun sas dimissiones de su Presidente de su Consìgiu Mario Draghi: semus faeddende de sa crisi de guvernu alluta in sas dies coladas dae su Movimentu 5 Stelle e apogiada dae su tzentrudestra.
Eris, in Senadu, Draghi l’at pedidu a manera crara si fiant totus prontos a unu patu nou. Ma sa fidùtzia, arribada cun sceti 95 votos in favore, non permitit prus a s’Esecutivu de traballare comente chi apat una intesa prus ampra. E duncas Draghi, custu mangianu, est andadu a dare sas dimissiones a Mattarella, chi at chircadu in cada manera de non nche fàghere rùere su Guvernu, dende·li peri 5 dies de tempus in prus pro bi pessare. Su Guvernu como at a abarrare in càrriga pro sos afares currentes. A pustis de sa vìsita a Mattarella, Draghi at addoviadu sos presidentes Casellati e Fico, chi a bortadedie sunt andados a chistionare cun su Presidente de sa Repùblica.
Custa crisi ponet in pistighìngiu sa polìtica natzionale e internatzionale, ca arribat in unu momentu dìligu meda pro s’economia, sa polìtica e sa sotziedade.
Como tocat de pessare a votare cantu prima pro ammaniare sa leze de bilàntziu intre s’iscadèntzia prevìdida e evitare s’esertzìtziu provisòriu.
Mariantonietta Piga