Custu istiu, in su nord de s’ìsula nostra, at a èssere girada sa versione noa de The Little Mermaid, in Itàlia mutidu La sirenetta. Sa versione noa at a èssere una pellìcula cun atores beros, e no unu film de animatzione comente su betzu, e chi tenet una mirada annoada de sa protagonista.
In custos tempos in ue b’at una sensibilidade manna a sas minorias, Ariel, sa protagonista de su film, at a èssere interpretada dae un’atora niedda, Halle Bailey. Su sèberu at pesadu cuntierras in sos USA, ca b’at gente chi pensat chi siat unu traimentu de s’istòria de Andersen. Issollòrios, ca semus faeddende de una sirena: un’animale faulosu mesu pische e mesu fèmina. Francu sa protagonista, chie est giòvana e non gasi famada, in sa pellìcula ant a retzitare Melissa McCarthy e Javier Barden.
Ma unu de sos personàgios de importu at a èssere su logu. E custu rolu l’ant leadu Casteddu sardu, Lungoni e mescamente su mare de Fìgari. Custa ocasione pro acollire grupos de traballadores de su tzìnema at a batire dinari e sa pellìcula at a fàghere connòschere sas bellesas de sa Sardigna in totu su mundu. Una noa bona de a beru in custos tempos de tristura.
(redatzione)
Leave a comment