Non fiat capitadu mai chi su Presidente de sa Repùblica aeret dimandadu a su Ministèriu de sa Giustìtzia de acrarire sas resones e su protzedimentu pro una rechesta de gràtzia, giai cuntzèdida. Non est capitadu mai chi apant annulladu una gràtzia, ma custu est su chi su guvernu est arrischende cun sa chistione aberta dae s’amnistia a Nicole Minetti dada dae Mattarella a pustis de su sòlitu caminu ghiadu dae su Ministru.
Nicole Minetti est istada cundennada intro duos protzessos pro peculadu, su furòngiu de dinari pùblicu, e pro àere favorèssidu sa prostitutzione. Sa pena fiat de tres annos e ùndighi meses de colare no in presone, ma in istruturas ligadas a sos servìtzios sotziales. Minetti fiat cussigera de sa Regione Lombardia, e ligada a s’istajone de su bunga-bunga de Berlusconi e a s’acontèssida a subra de “Ruby”.
Sa dimanda de gràtzia l’at fata issa etotu pro mèdiu de sos avocados suos, comente la faghent mìgias de àteros cundennados. S’annu coladu, pro nàrrere, de dimandas nd’ant fatu prus o mancu 1500, ma Mattarella nd’at dadu 27 ebbia. Custu ca sas rechestas lompent a su Ministèriu chi tenet sa responsabilidade de iscumproare sa calidade de su cundennadu e de sas resones chi bi sunt in suta, e chi dat sas lìnias de sighire a sos funtzionàrios chi batint a dae in antis s’iscumbata. Unu caminu difìtzile meda.
Sa chistione l’at pesada «Il Fatto Quotidiano» chi at iscopiadu chi sas resones presentadas dae Minetti diant pòdere èssere fartzas. Sa gràtzia, difatis, bi l’ant cuntzèdida ca depiat curare in sos USA su fìgiu adotadu in Uruguay, e cun sa cundenna no lis daiant su passaportu. Su problema est chi forsis su pitzinnu no l’ant leadu in domo a manera legale de su totu, e chi forsis sa maladia no l’at mai àpida. Si esseret beru custos suddidos, s’iscàndalu diat èssere gasi mannu chi Nordio diat pòdere pèrdere su rolu de Ministru, dende unu corfu mannu e malu a su guvernu Meloni, a pustis de sa pèrdida de su referendum, pròpiu in contu de Giustìtzia.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment