Una frabigga di sogni, s'illusione de s'indùstria sarda

Una frabigga di sogni, s'illusione de s'indùstria sarda

Sos primos annos de sa dècada de sos ‘60 de su de binti sèculos ant rapresentadu unu passàgiu epocale in s’istòria sarda.

Sas polìticas econòmicas adotadas dae sa classe dirigente italiana e sarda aiant chircadu de impiantare s’indùstria grae in Sardigna pro nde favorire, segundu issos, s’intrada in sa modernidade cun unu cambiamentu antropològicu chi aiat dèpidu trasformare sos sardos dae massajos e pastores a operajos. Su resurtadu, comente s’ischit, est istadu disastrosu.

Una de sas àreas interessadas a custu progetu sotzioeconòmicu est istada sa de Portu Turres, cun sa nàschida de su Petrolchìmicu.

De custu momentu de passàgiu contat, in Una frabigga di sogni, su portuturresu Gian Paolo Bazzoni, autore teatrale e de su Dizionario fraseologico sassarese-italiano, nàschidu in su 1935 e mortu in su 2014.

Su romanzu, iscritu in limba turritana, contat sos fatos de una famìllia de massajos de sa Nurra chi unu fìgiu, istracu de peleare in su sartu e finas de una mentalidade traditzionale chi paret fata de sacrifìtzios ebbia, chircat in ogna modu de èssere assuntu in una de sas fàbbricas noas chi si nch’ant mandigadu sos terrinos totu a inghìriu de sa bidda.

Essint a pìgiu sas diferèntzias intre sos giòvanos sartàrgios, immalitziados, e sos chi imbetzes istant in tzitade o si nche sunt tramudados a in ie, prus tramposos e a bortas malintragnados.

Sena de idealizare sa vida de su sartu, chi teniat e tenet finas lados negativos, Bazzoni ponet a pare sos duos mundos pro mèdiu de sa figura de su protagonista, Salvatore Tedde.

Rebelle e disigiosu de si nche fuire dae su mundu creadu dae su babbu e dae sa mama, a bellu a bellu non ammustrat proes e contras de ambas duas realidades.

Ddi faghent corona personàgios bios e agiumai reales, che a Domenica, ogetu de un’amore angustiosu, e Serafinu, su tzeracu bènnidu dae sa Sardigna tzentrale.

Una frabigga di sogni est essidu in su 2001, publicadu dae Magnum-Edizioni.

(gianni muroni)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *