Cunforma a un’indàgine istatìstica publicada eris dae su Corriere della Sera, su bonu de sos italianos est contràriu o dudosu cunforma a s’imbiu de armas a Ucraina. A minudu, petzi unu de tres italianos cheret chi bi nche las imbiemus. E de custa manera su mundu patzifista chircat legitimidade movende dae unu sentidu chi, emmo, est majoria, ma chi non nch’est in intro de un’idea de paghe progressista. Pro nos cumprèndere, miremus a s’evolutzione de Fratelli d’Italia, como fortza de guvernu e cun àteras ideas. Ite naraiat Giorgia Meloni in Parlamentu (est fàtzile a l’agatare in Youtube)?
«S’Unione europea non si lìmitet a acumprire a sos òrdines de su “prus chi non merèssidu” prèmiu Nobel pro sa paghe Barak Obama. S’Unione europea diat dèvere ischire chi non b’at motivu pro chi s’Ucraina nch’intret a s’Unione matessi e a sa Nato cajonende duncas una crisi cun sa Federatzione russa […] S’Itàlia retiret su sustegnu suo a sas santziones contra a sa Rùssia e penset a s’interessu suo sena èssere tzeracu tontu de interessos angenos».
Como, est beru chi cussa parlata est de su 2014 (duos annos a pustis Meloni iscrieit – de prus – de no aposentare trupas italianas in Letònia), ma si Fratelli d’Italia in sos annos est crèschida est finamentas gràtzias a custas positziones. Como sunt guvernende e in prus de un’ocasione ant a traìghere sas aspetativas de s’eletoradu issoro, ma cussas positziones de “interessu natzionale” sonat agigu comente “si la gherrent issos ebbia e non nos chircais”. E pro cantu siat beru chi sas armas imbiadas aumentant riarmu e gherra, onestu diat èssere a negare chi “s’interessu nostru” (ma poi, cale?) pedidu a majoria siat idea egoìstica? Si posca b’annanghimus fintzas su “non bi nche nd’imbiemus” naradu a manca no est acumpangiadu su bonu de sas bortas dae sa crìtica a sos disegnos neozaristas de Putin, podimus cumprèndere chi finamentas s’internatzionalismu nde sufrit.
Duncas, ite pertzentuale est sa de chie non cheret chi b’apat imbiu de armas? Cantu nch’est manna in intro de cussa pertzentuale matessi sa positzione internatzionalista chi cundennat cale si siat isciovinismu? A sos sundagistas li diamus pòdere propònnere de lu repìtere e de pedire a su matessi campione istatìsticu si sunt de acordu a serrare sas bases chi b’amus in Sardigna. O puru bellu diat èssere a cumbinare cussu 2/3 contràriu/dudosu cun su 2/3 de sos chi cherent chi a Alfredo Cospito (sundàgiu de pagas chidas a como) non nche li toddant su 41 bis.
Si naramus chi sunt duas chistione diferentes forsis no amus cumpresu (o non cherimus cumprèndere) su “senso comune” atuale de sos italianos. E de sos sardos.
màuru piredda
Leave a comment