Tzilibirche in su tzentru Sardigna

Tzilibirche in su tzentru Sardigna

Custu est su tertzu annu in su tzentru de Sardigna chi b’at un’invasione de tzilibirche, su problema est chi non sunt lòmpidos sos agiudos de sa Regione pro sos annos colados e chi non s’est fatu totu sas fainas pro non la fàghere torra acontèssere. Ocannu però s’invasione est prus manna de sos annos barigados e cun s’arriscu de betare a terra aziendas chi isperaiant in una pastura bundante pro istesiare sa possibilidade de impreare su mangime chi como at unu prètziu tropu artu.

Custu de oe est unu problema chi si connoschiat e sos assòtzios de categoria aiant postu s’apretu dae meda, ma sa Regione no at fatu meda pro ochìere custu babbautzu chi si màndigat totu. A pustis de èssere coladu, difatis, su terrinu paret brusiadu e non lassat nudda a sos animales e nemmancu a sos massajos. Un’àteru problema mannu est chi impitare sos insetitzidas chìmicos non si podet cando si pedint sos fundos pro su biològicu e sos prus naturales no ant dadu resurtos gasi bonos.

Sas aziendas de su setore non podent seberare intre sa produtzione e su dinari pro su biològicu: unu ebbia no est bastante pro andare a dae in antis. S’arrennegu creschet in sos pastores ca pensant chi si su problema fiat capitadu in àteros tretos de Sardigna, forsis sa polìtica fiat renèssida a fàghere carchi cosa de prus. Sa fide tando est paga e su tempus de mancu puru: isetare cheret nàrrere lassare chi su tzilibirche si màndighet totu.

(redatzione)

Leave a comment

Send a Comment

S'indiritzu email tuo no at a èssere publicadu.