Ryan Mac, Donie O’Sullivan, Drew Harwell, Matt Binder e Micah Lee sunt sos nùmenes de sos giornalistas chi nch’ant coladu carchi die in foras de Twitter. E non pro detzisione issoro. Elon Musk, s’amministradore delegadu nou de su social network famadu, aiat disinnadu de burrare sos profilos de sas pinnas mentovadas de su New York Times, de sa Cnn, de su Washington Post, de Mashable e de Intercept (gasi etotu sos indipendentes Aaron Rupar, Keith Olbermann e Tony Webster).
A bisu de Musk aiant violadu sas règulas de sa prataforma in contu de riservadesa personale. Est a nàrrere, aiant cumpartzidu sos datos pùblicos de su contu ElonJet pro su chi pertocat sos bolos privados de su Ceo. E comente pro Trump pro more de sa “Vox populi, vox dei”, Musk at reintegradu a sos giornalistas pro mèdiu de un’àteru sondàgiu.
“The people have spoken”, at twitadu Musk. Ma est beru chi – a su chi narat su New York Times – «the restoration of their accounts appeared to be contingent on them deleting posts that Twitter had flagged as “violating our rules against posting private information» (su riprìstinu de sos contos issoro pariat subordinadu a sa tòddida de sos post chi Twitter aiat signaladu comente “violatzione de sas règulas nostras contra a sa publicatzione de informatziones privadas”).
Semper su New York Times faeddat de un’àteru profilu: «The account of Susan Li, of Fox Business Network, has not been reinstated» (su de Susan Li, de Fox Business Network, no l’ant ripristinadu»). Arrennegu contra a Musk in sa Cummissione europea. Sa vitze presidente Vera Jourova at faeddadu de «lìnias rujas» e de «santziones» («There are red lines. And sanctions, soon»). E arrennegu b’at finamentas in s’Onu. Pro su cummissàriu pro sos deretos umanos Volker Türk, mancari su reìntergru, abarrant oriolos graes («Good news that journalists are being reinstated, but serious concerns remain»).
Gianfranca Orunesu
Leave a comment