Trivellas rentzianas contra a sa democratzia? Agiudade sos referendum

Trivellas rentzianas contra a sa democratzia?  Agiudade sos referendum

– de Marco Solinas  –

FullSizeRender (6)
Palatzu Chigi, sede de su Guvernu Italianu

 

Sa Sardigna, oe in die, cumpartzit su pròpriu destinu de s’Itàlia. E como custu destinu non paret bonu in nudda. Medas sunt is cosas chi cada Sardu, ma fintzas unu cale si siat Italianu, bidet e cumprendet chi diat èssere pretzisu a cambiare, cando no a burrare de su totu. In manera particulare, dae cando su guvernu de Matteo Renzi est arribadu in Roma, unu muntone de provedimentos sunt istados annuntziados, e una parte pitica de custos fintzas aproados (sa polìtica de Renzi, che a sa de su mèntore suo, Berlusconi, est fata de annùntzios medas e cosas fatas pagas). De custa parte pitica de cosas fatas a beru, calicuna podimus fintzas ammìtere chi est bona (sos 80 èuros, pro nàrrere… chie ddos at pigados, e ddos pigat, ischit chi faghent sa diferèntzia) ma sa prus parte sunt cosa de nche imbolare a s’àliga. Bidu chi in Roma non tenent intentzione peruna de currègere custos mostros legislativos, ma antzis ddos rivèndicas narende chi sunt cosas bonas e netzessàrias pro s’isvilupu e sa modernizatzione de s’Itàlia, dia tocare a su pòpulu a si mobilitare pro cambiare su chi non dd’agradat.

Su perìgulu prus mannu pro cantu pertocat sa Sardigna, benit dae su gasi naradu “Sblocca Italia”: una deregulamentatzione de sos interventos in s’ambiente, chi passat a pitzu de su pàrrere de sos entes locales cun sa iscusa de su caràtere istratègicu de is òperas (ma ite cherent custos, firmare sa modernizatzione de s’Itàlia? Tenint sa sìndrome NIMBG! “Gufi!”). S’arriscu est a bìdere sa terra e su mare nostru totu a istampos, a tipu gruviera: sas trivellas sunt acanta de arribare, in terra e in mare!

Ma su “Slocca Italia” no est s’ùnica cosa mala chi tocat a is Sardos: che a sos Italianos, nois puru amus connotu sa tutela in su traballu. Che a sos Italianos, nois puru amus votadu connoschende a sa persone chi boliamus mandare a Roma a nos rapresentare. Che a sos Italianos, nois puru amus mandadu a is fìgios nostros a iscola, ue sa libertade de is maistros e profesores fiat sa primu garantzia de sa calidade de s’imparu. Bene: cumentzemus a nos iscarèssere de totu custas cosas! Is efetos prus malos de sas leges de Renzi no ant a istentare galu meda a si presentare, fintzas a is ogros de is chi immoe narant “ite bellu” a totu su chi in Roma sunt faghende.

Ma b’est chie at detzididu de nàrrere NO a totu custu. O mègius: bolet nàrrere chi EJA a sa possibilidade de firmare custu ischifu. Sa faina seberada est sa prus espressione manna de democratzia: su referendum. Sa formatzione “Possibile” de Giuseppe Civati at cumentzadu in su mese de austu a collire sas firmas pro sa presentatzione de 8 cuesitos chi ant a pertocare bator temas printzipales: democratzia, ambiente, iscola, traballu. Andende a su situ http://referendum.possibile.com/ podimus lèghere carchi informatzione in prus a pitzu de custos cuesitos; in sìntesi:

  1. (DEMOCRATZIA) Burrare is capolistas blocados e sas candidaturas mùltiplas
  2. (DEMOCRATZIA) Burarre sa lege eletorale proportzionale (su gasi naradu “Italicum”) cun prèmiu me majoria, capolistas blocados e candidaturas mùltiplas
  3. (AMBIENTE) Torrare a un’economia prus ecològica: burrare sas trivellas in mare
  4. (AMBIENTE) Torrare a un’economia prus ecològica: burrare su caràtere istratègicu de sas trivellas
  5. (AMBIENTE) Torrare a un’economia prus ecològica: colare dae sas grandu òperas a is piticas
  6. (TRABALLU) Tutela de su traballadore: burrare su demansionamentu
  7. (TRABALLU) Tutela de su traballadore dae is litzentziamentos illegìtimos
  8. (ISCOLA) Tutela de sa dotzentza e de s’imparu: burrare su podèriu de “chiamata” de su prèside-manager

Tocat de collire nessi 500.000 firmas intre su 30 de cabidanni, in totu Itàlia, pro chi custos referendum si potzant fàghere. Cada unu de nois podet fàghere sa diferèntzia: in medas comunos de sa Sardigna is volontàrios de “Possibile”, cun s’agiudu fintzas de gente chi non si reconnoschet in sa formatzione polìtica de Civati ma at cumpresu bene chi custa NO EST sa batalla de una persona ebbia ma de totus, ant aparitzadu e sunt galu aparitzende is banchitos pro collire sas firmas. Ma sos mòdulos si podent giai agatare in sa sede de is comunos: bastat de andare in cue cun unu documentu de identidade vàlidu e firmare. Leghide in sa pàgina web de Possibile pro nde ischire de prus, mesches pro comente firmare a manera curreta e fintzas, si bolides, pro comente agiudare a sa collida in manera ativa.

Ma a andare deo e tue non bastat: est pretzisu fintzas a batire gente, a ddu contare a totus chi b’est custa possibilidade de firmare su machiore megalòmane de Renzi, chi bolet distrùere meda de sas pagas cosas de profetu chi sa Sardigna aiat leadu dae s’Itàlia.

 

http://referendum.possibile.com/

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *