Trint'annos dae su degòlliu de via D'Amelio

Trint'annos dae su degòlliu de via D'Amelio

Su 19 de trìulas de su 1992 in Palermo iscopiaiat una bomba chi ochiat su magistradu Pàolo Borsellino in paris cun sos politziotos de s’iscorta sua, in sos cales bi fiat Emanuela Loi, una giòvana sarda, chi est sa prima fèmina de sa Politzia a mòrrere in servìtziu.

S’atentadu est s’ùrtimu de un’ordìngiu de violèntzias pro corfare sas alas de s’Istadu italianu chi fiant batalliende contra a sa màfia sitziliana. Difatis chimbanta sete dies a dae in antis de via D’Amelio aiant mortu Giovanni Falcone in s’istrada pro Capaci. Sos istragos fiant una manera de sa màfia pro obligare sas istitutziones a menguare sas penas pro sos mafiosos a intro de presone, ma fintzas pro agabbare su disafiu chi sos corleonesos aiant inghitzadu contra s’Istadu.

S’importu de custu momentu si cumprendet ca sos mortores sunt istados arrestados e cundennados totu cantos, cosa istrana pro su Paisu de sos istragos sena culpàbiles. S’istajone fiat caente non petzi pro s’istiu, ma fintzas ca si fiat seghende sa Prima Repùblica e sos acordos a subra de sos cales fiat fraigada. Intre pagu est inghitzada s’iscumbata famada comente Mani Pulite chi est unu frutu de sa pelea de Falcone e Borsellino e de s’importu chi sos magistrados ant tentu in cussos annos.

(redatzione)

Leave a comment

Send a Comment

S'indiritzu email tuo no at a èssere publicadu.