Dae su 10 a su 12 de nadale s’AES, s’assòtziu de sos editores sardos, organizat in Tèmpiu, cun s’agiudu de sa Comuna e de sa Regione, sa manifestatzione L’isola dei libri.
Sa mustra de su libru est s’ocasione pro tzelebrare sa de tres editziones de sa rassegna Qui c’è aria di cultura.
Su tema de sa manifestatzione at a èssere su ligàmene intre territòriu e identidade, dende un’atentzione particulare a sa bibliovariedade e a sa microeditoria locale.
S’inauguratzione est fissada a sas chimbe de sero. Su programma de ocannu previdet a mangianu sa presèntzia de editores e autores in sas iscolas de sa bidda, mentras a su sero ddo’ant a èssere sas presentatzione de sos libros in cumpangia de sos letores.
Su moderadore de sa primu die at a èssere Salvatore Tola, de sas àteras duas Francesco Giorgioni.
Sas òperas de su 10 ant a èssere: un omenàgiu a Grazia Deledda cun Alfa editrice e Isabella Mastino, Il cacciatore de Alberto Capitta, pro Imago Multimedia, presentadu dae Sara Puggioni, Lo zodiaco nella Divina Commedia de Gian Nicola Cabizza, pro Mediando. In fines Angela Antona e Nicola Castangia ant a faeddare de Archeologia e Alta Gallura, viaggio nel passato.
S’11 Pier Giorgio Pinna presentat Virus & Censure. Il contagio mediatico publicadu dae Mediando. A pustis ant a presentare Grandi alberi e foreste vetuste della Sardegna de Ignazio Camarda, Delfino editore, e Attaccati alle radici. Alberi di Sardegna, Enrico Spanu Edizioni, de Lello Caravano e Enrico Spanu. Nde faeddant sos autores cun Bruno Merella. Concruit sa die Terra muda de Decimo Lucio Todde e Bruno Piccinnu, publicadu dae Taphros.
Su 12, ùrtima die, tocat a Edgar Allan Poe. Il mistero della morte de Fabrizio Raccis, publicadu dae Catartica, I saggi raccontano de Gisella Rubiu, editziones Taphros e La scena nascosta (come ci vediamo), de Bachisio Bandinu pro Il Maestrale.
(gianni muroni)
Leave a comment