Eris pagu prus o mancu a sas 16,30 de merie in tretos de Casteddu at pròidu meda de repente. Sunt falados setantaduos millìmetros de abba chi ant allagadu a Pirri. Sas carreras sunt divènnidas rios chi si sunt leados veturas, intrende in chentinas e fatende dannos maicantos.
Sa situatzione prus mala est in sos sartos de su Parteolla in ue sa temporada at isciusciadu coltivos e istruturas aziendales. Fintzas s’aeroportu de Su Masu s’est firmadu pro carchi ora, ca fiat perigulosu pro s’istrasura manna; pro custu sos bolos chi depiant lòmpere a cue sunt istados istesiados in s’Alighera.
A pustis de duos meses de calura e de sicagna, como chi est bènnida s’abba paret chi siat peus de su male chi bi fiat prima. Sa neghe est de sa temperadura tropu arta de s’abba chi cando atopat s’àera frita ingendrat custas acontèssidas estremas. Cun su mare gasi caente e cun s’àtera calura chi galu depet suprire, comente at a èssere sa torrada de su tempus malu?
(redatzione)
Leave a comment