In custa domìniga de pasu de sa Sèrie A pro more de sos impignos de sos biaitos de Spalletti, b’at de contare de àteras categorias de sos campionados de fùbalu. Sa sèrie C est arrivada a sa de suas giorronadas e, in ambas duas, b’at àpidu vitòria pro sas duas iscuadras sardas in cue impignadas. Sa Torres at esordidu in trasferta sa chida colada binchende contra a sa Recanatese 2-1. Sos tataresos ant dominadu sa partida colende in vantàgiu cun Ruocco e sena si fàghere assuconare dae su parègiu de sos meres de domo (chi, fiat fintzas un’autogol). Scotto in sa ripresa at garantidu sos primos tres puntos a sos torresinos. Puntos raddopiados erisin s’istàdiu tataresu intituladu a Vanni Sanna. Fintzas inoghe 2-1, cun sa diferèntzia chi custu giru est tocadu a sos istràngios a colare in vantàgiu. Sa dopieta de Diakite (unu rigore e un’isconcada) at inchesu su gosu de sas tribunas turritanas chi comintzant a bi crèere. Custos sos ses puntos balangiados imbetzes dae s’Olbia in custas duas giorronadas. Sa chida colada sos terranoesos ant bìnchidu in su Nespoli de sa tzitade issoro contra a su Cesena. Un’àteru 2-1 cun sas marcaduras de Nanni e de s’ex Cagliari Ragatzu (rigore) lassende a sos biancu-nieddos su gol de sa bandera ebbia. Chenàbura s’Olbia at bìnchidu in trasferta contra a sa Vis Pesaro gràtzias a una rete de Belloni de conca. Torres e Olbia sunt duncas dominende sa classìfica, primos in pare cun sa Carrarese chi però tenet una mègius diferèntzia de retes. Pro s’isport isulanu est una bella proa chi, in parte, covecat sos resurtados metzanos de su Cagliari in sèrie A. Olbia e Torres como s’ant a dèvere atopare pro su derby in programma sa giorronada imbeniente. At a èssere unu disafiu chi, fintzas cunforma a su chi faghet sa Carrarese, at a pòdere mudare sa classìfica partziale atuale. E at a èssere unu disafiu cun grandu rivalidade intre custas duas sotziedades istòricas chi in s’iscudetu issoro marcant sas datas 1903 e 1905.
màuru piredda
Leave a comment