A pustis de duos annos torrat su Vinitaly de Verona, sa rassigna enològica internatzionale, chi at bidu partetzipende sa Sardigna puru cun su binu suo.
Cust’annu su progetu e sa gràfica de s’ispàtziu sardu fiant ispirados a su ligàmene forte intre binu e territòriu de orìgine, cun elementos pro ammentare sa natura e su paèsagiu sardu, acumpangiadu dae sas paràulas: “L’impronta di un territorio, l’anima di una terra”.
E cun custa idea, s’ispàtziu espositivu aiat sa punna de leare a manu tenta su visitadore in unu percursu de sensos pro balorizare sa richesa de su territòriu sardu. 1700 metros cuadros pro 4 dies sunt istados sa domo de sa Sardigna, chi at ospitadu 71 aziendas vitivinìculas in rapresentàntzia de sa produtzione regionale.
Sa granatza Juighissa de sa Cantina de sa granatza de Aristanis l’ant premiada comente mègius binu italianu; premiados peri Maimone Cannonau di Sardegna Doc 2017, e Seu Nieddera rosato, Valle del Tirso Igt 2018. Intre sos reconnoschimentos, de singialare peri cussu a s’atividade de sas Cantinas Su ’entu de Seddori, cun su premiu “Angelo Betti” 2022, in onore de s’ideadore de su Vinitaly, 50 annos a oe.
Mariantonietta Piga