Su deghe de custu mese sa Silicon Valley Bank, una banca istadunidensa, est faddida e su guvernu federale l’at tancada. Comente mai est sutzessu? B’at carchi arriscu pro s’economia europea?
Sa Silicon Valley Bank fiat una banca chi aiat su prus de sos investimentos in s’economia tecnològica. Sos soddos suos los investiat in atziones de sas indùstrias mannas de su setore, in tìtulos de Istadu americanos e su chi balangiaiat lu gastaiat pro sustènnere sas aziendas noas de sa tecnologia. Prus o mancu su mesu de sas “startup” noas aiat agatadu sos fundos in custa banca. Ma custas sunt una genia de impresas chi in sos primos annos perdent dinari maicantu e chi balàngiant, mancari meda, ma a lenu a lenu. Su prus de su dinari intraiat dae sos investimentos, chi però dae carchi mese sunt andende male.
Amus faeddadu inoghe de sas dificultades mannas de su setore tecnològicu. Oe est essida a campu sa noa chi Meta, su grupu in ue b’at Facebook e Instagram, est litzientziende àteros deghe mìgia traballadores. In bursa sas atziones de totu custas impresas sunt falados, minimende sos balàngios. S’àteru setore chi at fatu pèrdere dinari a sa Silicon Valley Bank est cussu de sos bond americanos chi, a pustis de sa crèschida de sos tassos seberadu dae sa Banca tzentrale americana, ant pèrdidu balore. Su prus de sas atzione de custa banca fiat de custa genia.
Sa banca faddida fiat minore, ma de importu mannu ca sos clientes suos fiant pro su prus aziendas. Est pro custu chi su guvernu de Biden lis at dadu deretu un’agiudu, assegurende sos contos currentes e in custa manera abbachende sa crisi. Su problema est chi su guvernu Trump aiat fatu una cantas leges pro bogare controllos e règulas pro sas bancas “regionales”, comente sa Silicon Valley Bank.
Sas resones de custa crisi tando sunt prus de una: s’ispetzializatzione de sos investimentos de sa banca, su traballu chi faghiat pro sas “startup”, sas règulas e sos controllos faltados. Problemas chi in Europa b’at pagu, ma bisòngiat de bìdere si b’at carchi istitutu de crèditu chi aiat ligàmenes meda cun custa banca minoredda. Pro como sa situatzione non paret gasi mala: su 2008 paret chi non siat torrende.
Gabriele Tanda
Leave a comment