Custa de eris est sa de batòrdighi chi su guvernu Meloni at impugnadu una lege de sa Giunta Todde. Custa borta est tocadu a su “Reddito studentesco”: su Cussìgiu regionale a s’unanimidade aiat seberadu de aprontare unu fundu pro chie, residente in Sardigna e cun unu ISEE bassu meda, cheriat torrare a istudiare, dende·li cada mese unu pagu de èuros. Una segunda possibilidade in un’ìsula in ue b’at, e mescamente b’est istadu, unu disamparu iscolasticu artu meda. A sos chi cheriant leare sa licèntzia mèdia sa lege lis daiat 475 èuros, a sos chi cheriant su diploma 625 èuros e sos chi cheriant sa làurea 775 èuros. No fiat una medida chi andaiat a tocare sos giòvanos prus minores, ma sos mannos chi aiant disamparadu s’istùdiu cando fiant pitzinnos, cun livellos de edade pretzisos: Bisòngiat de àere barigadu sos degheoto annos pro sa licèntzia mèdia, 25 pro su diploma e prus de trinta pro sa làurea. Summende totu cantu semus faeddende de tres milliones pro su primu annu, pagu pro una Regione che a sa Sardigna. Sa lege regionale fiat una proposta de sa manca, ma chi est istada atzetada e sustènnida dae su Cussìgiu intreu, su de la refudare est un’atu grae e chi boga sa fide intre sas duas istitutziones.
Su guvernu Meloni, cun su Ministru Calderoli, at seberadu de impugnare sa lege pro duas chistiones: ca at violadu s’artìculu 3 de sa Costitutzione e ca non bi sunt fundos pro lu finantziare. S’artìculu mentovadu dae Calderoli est cussu de s’ugualidade de sos tzitadinos cara a sa lege e chi òbrigat s’Istadu a nde bogare cale si siat istorbu a s’isvilupu de sa persone. Paret una brulla, faeddende de su “Reddito studentesco”, ma est gasi.
Sa Giunta at decraradu chi sa medida abarrat ritza e chi non càmbiat, fintzas a cando sa Corte Costitutzionale no at a giuigare. Su problema est chi nemos at a arriscare de incumintzare unu caminu de istùdiu cun sa possibilidade de abarrare sena sustènniu posca de pagos meses. E custu cheret nàrrere chi sa lege no at a funtzionare e non pro neghe de sa Regione.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment