Su bìndighi de ghennàrgiu su vulcanu Hunga Tonga-Hunga Ha’apai chi istat in suta de su mare est iscopiadu covechende de chisina unu Paisu intreu, Tonga, e pilisende gasi meda su mare chi at fatu nàschere unu tzunami chi est lòmpidu in totus sas costeras de s’Otzèanu Patzìficu, in una manera gasi forte chi at ochidu duas persones in Tzile.
Tonga est aorada de su totu dae su mundu e galu como, posca tres dies, non si est galu cumpresa sa mannària de sos dannos. Internet, difatis, no andat ca s’est segadu unu cavu chi ligaiat su regnu a sa retza internatzionale. Sos aèreos chi sunt resèssidos a colare subra de sas ìsulas ant bistu tzitades e biddas prenas de chisina e cun dannos ligados a s’unda de tzunami, ma non sunt pòdidos falare a terra ca non b’at aeroportu perunu dae impreare e fintzas pro sos navios no est fàtzile ca no ischint in ue andare, ca sa geografia de sas ìsulas est mudada.
Ponende a banda sos dannos giai capitados, su perìgulu de como est chi sa populatzione non potzat manigare nen bufare: s’abba s’est luada, sos animales si nche sunt mortos e sos fundos brusiados. A los sarvare si est mòvida dereta sa Zelanda Noa, chi est imbiende agiudos, ma sa situatzione est mala de a beru. Isperemus chi custas bellas ìsulas potzant torrare a nàschere luego.
(redatzione)
Leave a comment