Sos giùighes de su tribunale de Milanu ant seberadu de cuntzèdere a Tirrènia àteras binti dies pro si pònnere de acordu cun sos creditores suos. Sa noa de sas dies coladas fiat chi sa procura aiat refudadu su pranu propostu dae CIN-Tirrenia bìndighi dies in antis e s’arriscu mannu fiat su fallimentu. Cussu arriscu però est petzi istesiadu de àteras binti dies. In custu tempus su grupu de Onorato at a chircare una manera pro torrare unu muntone de dinari. Su grupu difatis tenet unu passivu de dughentos milliones e unu dèpidu de prus o mancu batorghentos milliones. De custos ùrtimos belle chentu otanta sunt de s’Istadu e de sos cummissàrios de s’amministratzione istraordinària.
Su ses de maju sos giùighes ant a seberare s’ite fàghere. Su fallimentu non cumbenit a nemos: s’azienda tancat e sa cuota chi si podet recuperare est pitica. S’acordu est sa possibilidade chi podet garantire sos creditores, chi gasi si podent torrare a leare su prus de su dinari; e podet sarvare sos ses mìgia traballadores de sa sotziedade, chi cun unu fallimentu ant a pèrdere su traballu. Ma sas dificultades sunt medas de a beru.
In su mentres, semper a Milanu, si nche est abertu un’àteru protzedimentu: un’iscumbata chi pertocat sa regularidade de su dinari chi sa Moby at donadu a assòtzios, fundatziones e mescamente a partidos polìticos, comente su PD de Renzi, Su Movimento Cinque Stelle, Fratelli d’Italia e Forza Italia.
Calicunu non podet sufrire sa Tirrènia e Onorato: navios betzos e prètzios gastosos, mescamente in s’istajone arta, naramus chi non ant ingeniadu sos sardos. Ma si at a fallire sos problemas pro custu istiu ant a èssere mannos medas. Semus colende sa crisi econòmica prus iscurigosa dae su tempus de sa sigunda gherra mundiale, e sena sa possibilidade de biagiare cun sos navios, prus che totu su turismu at a mòrrere. Comente a semper semus dipendentes dae sos sèberos chi benint dae s’Itàlia a subra de aziendas italianas, detzisiones chi nos falant a coddu sena pòdere nàrrere nudda: amus a bìdere ite nos batit su beranu.
Gabriele Tanda
Leave a comment