Oe sa Confindustria de Nùgoro proat a pònnere presse a sa Regione e a su Ministèriu, pro otènnere su dinari de impreare pro su fràigu de una ferrovia dèghida chi andet dae sa lìnia Tàtari-Casteddu e, colende dae sa tzitade barbaritzina, lompat fintzas a Terranoa.
Nùgoro est s’ùnicu cabu-de-logu de provìntzia chi non tenet ligàmene cun sa ferrovia normale de s’Istadu, ma petzi cun unu trenu prus minore e chi andat cun unu iscartamentu reduidu. Como b’at sos soddos de su PNRR e si podet proare a sanare custa tortesa.
Nùgoro no est a sa sola, fintzas sos entes locales de sa zona de Tàtari, carchi chida a como, si nche sunt addobiados in Nule pro faeddare de sos progetos dae presentare a su guvernu e a sa Giunta. Su pidinu prus mannu est chi s’ocasione de sos fundos europeos chi depent èssere gastados a sa lestra e cun aficu, potzat colare sena produire nudda de bonu in Sardigna. Bisòngiat de cumprèndere si est tropu a tardu e ite cheret fàghere sa Regione.
(redatzione)
Leave a comment