Sa Cummissione Europea at detzisu de proibire a sos dipendentes – dae su 15 de martzu – s’impreu de sa prataforma TikTok. Sa motivatzione? Arriscos, narant, chi pertocant a sa seguresa natzionale. S’aplicatzione, duncas, at a èssere bandida in sos dispositivos aziendale e in sos privados de sos traballadores, impreados pro atzedere a sos servìtzios mòbiles de sa Cummissione.
Sa mesura contra a sa prataforma tzinesa l’ant pigada a pustis chi sos cummissàrios europeos pro sa giustìtzia, sa trasparèntzia, sa cuncurrèntzia e sos afares internos ant avisadu a Shou Zi Chew (amministradore delegadu) pro chi aeret respetadu su Gdpr.
Su 15 de santandria coladu, difatis, TikTok at ammìtidu chi sos dipendentes suos in Tzina podent atzèdere a sos datos personales de sos utentes peri totu su mundu.
E in Itàlia? Su ministru de sa Pùblica amministratzione at dadu a ischire chi, luego, ant a pigare una detzisione e chi tocat de cumprèndere cale sunt sos arriscos in contu de seguresa natzionale.
Custa sa protesta de TikTok, acumpangiada dae una nota indiritzada a sa Cummissione matessi in contu de segurasa, narende chi sos datos sunt garantidos.«Amus cuntatadu sa Cummissione – at naradu sa boghe de sa prataforma mentovada – pro pònnere in craru sas cosas e pro nàrrere comente protegimus sos datos de sos 125 milliones de persones de s’Unione europea chi cada mese nche sunt in intro de TikTok. Semus sighende·bi·la megiorende s’assentu nostru in contu de seguresa de datos, fina pro mèdiu de s’aprontu de tres tzentros de datos in Europa pro los chistire a livellu locale».Su chi semus bidende diat pàrrere unu de sos campos de batalla intre s’Europa e sa Tzina, duos blocos econòmicos in pòrfia, mancari sa cumpetitzione tzinesa siat prus indiritzada a s’aversàriu prus mannu addae de s’Otzèanu Atlànticu.
Gianfranca Orunesu
Leave a comment