Tiesi: oe s'ammentat s'atacu de sos sordados de su re contra a sos patriotas sardos

Tiesi: oe  s'ammentat s'atacu de sos sordados de su re   contra a sos patriotas sardos

-de Sarvadore Serra-

tiesi2panorama-tiesi
Tiesi a dies de oe

In su faeddu de Tiesi b’est s’espressione “s’annu de s’atacu”.  Si riferit a su 1800. Est su   6 de santugaine de cussu annu chi sas fortzas reatzionàrias ant atacadu sa bidda pro reprìmere su movimentu antifeudale.

   Ma, torramus in palas in su tempu.  In su cumintzu de su sèculu XVIII s’Europa fiat bulugiada  dae sas gherras  de sutzessione ispagnola chi si sunt congruidas cun sos tratados de  Utrecht, Rastadt e Londra. In su 1720 su Rennu de Sardigna est coladu a su duca  de Savoja.    Custu no at cambiadu pro nudda sa cunditzione mala  de sos sardos, ca sos feudatàrios si sunt sutamissos a su re  nou pro non pèrdere sos privilègios issoro.

   Su fèudu de Tiesi l’aiat eredadu a primos de su sèculu XVII Donna Evilla Manca,  chi sos discendentes suos sunt abbarrados in sa bidda, in su palatzu ducale, pro prus de unu sèculu. In Tiesi b’aiat misèria, mortalidade infantile e delincuèntzia;  sos abusos de sos feudatàrios fiant semper prus malos a aguantare; ma in totu sa Sardigna, in s’agabbu de su 700, s’est pesadu su bentu de sa rivolutzione.

   Sos tiesinos e sos de sas biddas a curtzu fiant inchietos e arrenegados pro s’aragone  de su duca Don Antoni Manca, pessonàgiu prepotente e istrambòticu, chi pretendiat chi sos vassallos  li fagherant a banchitu cun s’ischina. Narant chi una bia su  vassallu Bustianu  Dore non s’est chertu reduire a custu umìliu: l’at puntadu una lepa e l’at naradu de si sèere in cue.

In su 1789 b’aiat sicanna e carestia. Su cussìgiu de sa comunidade  at pedidu a su  vitzerè e  a su guvernadore de Tàtari de cumbìnchere su duca a abbrandare su rigore. Ma issu at fatu male e peus, e at fatu pagare sas tassas fintzas a sos preìderos, chi fintzas a tando fiant esentes.

Giòmmaria Angioy
Giòmmaria Angioy

 In s’ìnteri si fiat formadu in totu sa Sardigna unu movimentu antifeudale ghiadu dae Giomaria Angioy.  Sa bidda de Tiesi est istada sa prima a mustrare sa voluntade de non pagare sas tassas a sos feudatàrios. In s’ìnteri b’aiat cuntierra intre su  vitzerè Vivalda e su guvernadore de Tàtari  Santuccio, ca su  vitzerè aiat pedidu a sos cussìgios comunitàrios  de sinnalare sos soprusos de sos feudatàrios. Ma cussos ant paradu fronte e Santuccio at iscunfessadu s’operadu de Vivalda.     Angioy tando at cumbintu a  Vivalda a emanare unu pregone de cundenna de Santuccio e a nominare tres cumissàrios de imbiare in su Cabu de Susu.  In mesu de custos bi fiat  Frantziscu Cilocco, oradore de gabbale chi  at intzighidadu sas populatziones contra a sos feudatàrios. In Tiesi at fatu connòschere su pregone de su vitzerè faeddende a sa gente dae sa ventana de una domo. Sos tiesinos, ingerrados  dae  sas paràulas suas, sunt tzucados a su palatzu de su duca e nche l’ant ghetadu belle totu.

   Su  24 de santandria de su  1795 sas comunidades  de Tiesi, Bessude e Cherèmule ant fatu unu patu contra a su  regìmene feudale, pedendeˑnde  in manera esplìtzita s’abolitzione. Su patu naraiat chi fiant contra a sos feudatàrios e a su guvernadore Santuccio, ma chi giuraiant ubidièntzia a  su vitzerè. Santuccio at pedidu agiudu a su  vitzerè ma cuddu mancu l’at rispostu.  .    In  s’ìnteri Cilocco, agabbada sa missione sua in sas biddas, at detzisu de intrare in Tàtari;  at collidu in caminu unu muntone de òmines armados e est arribbadu su 28 de nadale;  a pustis de 7 oras de batalla Santuccio s’et rèndidu; in su matessi tempus sos tiesinos ant torradu a assaltare su palatzu de su duca.

   Vivalda, però,  at cumintzadu a tìmere chi su movimentu  antifeudale s’esseret ispartu a su Cabu  de Giosso, faghendeˑsi movimentu anti-istitutzionale. Duncas at detzisu de cunfiare a  a Giuanne Maria Angioy sa tarea  de torrare a pònnere òrdine in su Cabu de Susu.  Cando est lòmpidu a Tàtari, a Angioy l’ant retzidu in manera triunfale.  In s’ìnteri in  Tiesi, su 17 de  martzu de su 1796, 32 biddas ant fatu un’àteru patu antifeudale.

   Vivalda cheriat chi  Angioy esseret prus malu contra a sos rebelles  e chi aeret coberadu sas tassas fintzas cun sa fortza. Ma Angioy no at postu mente. Antzis, s’est postu a ghia de sas comunidades unidas dae su patu antifeudale pro mòere a Casteddu. Ma cando nch’est lòmpidu a Aristanis, acumpangiadu dae sos rapresentantes de sas biddas, su vitzerè l’at destituidu dae s’incàrrigu;  cunstatadu su fallimentu de s’impresa e timende a lu protzessare, Angioy at leadu su caminu de su disterru, andendeˑsiˑnche a  Frantza.

  In s’ìnteri sas tropas de su vitzerè sunt lòmpidas a Tiesi,  e  ant custrintu su cussìgiu comunitàriu  a giurare fidelidade a su soveranu. In totu su Cabu de Susu s’est creadu un clima de  terrore.    Su re at dadu ampra manu a sos feudatàrios, chi ant sighidu a tratare male sos vassallos. Sa càrriga de vitzerè est colada a Carlo Felice e sa de  guvernadore de Tàtari a su frade  Benedetto Maria Placido Conte de Moriana. 

Motos sardos antifeudales
Motos sardos antifeudales

 Moriana at emanadu unu pregone ponende règulas pro su coberòngiu de sas tassas. Ma sos feudatàrios no nde cheriant s’intesa,  e su  duca Manca at ordinadu a sos suos de coberare totu sos deretos, legales e illegales, presentes e passados. Sos vassallos tiesinos, amparados dae sos preìderos, si sunt refudados de pagare e sa note intre su 22 e su 23 de cabudanni ant ammaniadu una manifestazione de  protesta in dae in antis de sa domo de su sìndigu, pedendeˑli de intervènnere contra a su duca. Sa die in fatu su sìndigu at fatu ischire a su vitzerè chi sa gente non cheriat pagare. Moriana at cramadu deretu a  Tàtari su sìndigu e su cussìgiu comunitàriu e lis at promissu chi diat èssere intervènnidu contra a su duca. Ma sos tiesinos non b’ant crèidu a custa promissa e si sunt ammaniados pro sa batalla. Issos teniant resone: cun una lìtera imbiada dae Tàtari dae s’istudente  Schintu de Bessude, su preìderu don Antoni  Sanna  est istadu informadu chi su guvernadore fiat ammaniende un’atacu contra a sos tiesinos, e chi sos armados diant èssere lòmpidos su 6 de santuaine, pro distruire sa bidda.

Nche l’ant ischidu fintzas in sas biddas a curtzu e totus ant ammaniadu sa defensa. Bessude at mandadu 150 òmines armados, Bànari  àteros 150. In Tiesi sunt resessidos a  organizare 500 òmines. Moriana at dadu su cumandu de s’ispeditzione  a su cav. Grondona e in segretu at imbiadu unu raportu a totu sos capitanos de sos militzianos de su Cabu de Susu pro atacare Tiesi, informendeˑlos fintzas  chi diat àere dadu s’amnistia a totu cussos bandidos chi aerent leadu parte in s’atacu.  S’armada at mòidu dae Tàtari  a sas sete e mesu de sero de su 5 de santugaine. Pro totu sa note at acudidu  gente  a su puntu de cuntzentramentu. A s’arbèschida fiant  1500:  pro su prus fiant bandidos  chi si fiant postos paris cun sas tropas regulares isperende de otènnere s’amnistia. A sas sete de mangianu ant  mòidu chirru a Tiesi. Sa bidda s’est ammaniada a parare fronte a s’atacu. In mesu de sos difensores bi fiat fintzas su mastru de ferru  Frantziscu Ànghelu Santoru (Mastr’Ànghelu) chi, mancari aeret sas ancas paralizadas e si moeret  in una cadrea a bratzolos, at chertu leare parte in s’impresa ponende a disponimentu sas calidades suas de tiradore. Apostadu in su campanile at isetadu sos inimigos cun s’òdiu in su coro. Grondona at fatu sonare sos tùmbaros pro intimare sa resa, ma sos biddaresos ant rispostu cun frùschios e ingiùrgios. Tando s’est iscadenada sa batalla. Sos reatzionàrios ant atacadu sa bidda.

A sos òmines de  Grondona ant cuminztadu a lis  sparare a palas  unos 25  cheremulesos acudidos pro agiuare sos tiesinos. A Grondona etotu l’at fertu a una pala  Mastr’Anghelu  cun un’ archibusada (S’archibusada de Mastr’Anghelu). Ma sos reatzionàrios fiant tropu numerosos: sa bidda s’est prenada de inimigos  chi ant irrobadu sas domos e ant cumintzadu a pònnere fogu. Sa batalla at duradu oras, ma in fines sos patriotos si sunt rèndidos e ant cunsinnadu sos fusiles. Nd’ant arrestadu 23. Sas tropas regulares si nche sunt ghiradas a Tàtari. Ma in sa bidda sos abbarrados sos bandidos, chi nch’ant ghetadu sas ghennas de sas domos, ant furadu totu su chi podiant  furare, sunt andados a violentare  sas fèminas chi chircaiant de si difèndere cun fustes e ispidos.    In totu b’at mortu 14 pessones; 34 sunt abbarradas fertas (duas de custas sunt mortas dae cue a pagas dies);  18 domos nche las ant faladas a fogu.      Ma sa repressione non fiat agabbada. Moriana at formadu unu cussìgiu de gherra  pro punire sos patriotos: parte de sos arrestados sunt istados impicados su 27 de freàrgiu de su 1801 in sas furcas  de “Mesu de Giagas”,  àteros sunt istados cundennados a sa presone. In medas si sunt postos a bandidare.

Mastr Anghelu de Tiesi
Mastr Anghelu de Tiesi

  A distàntzia de un’annu, su re Carlo Emanuele IV at cuntzèdidu s’amnistia a sos patriotos chi fiant galu bandidende. Ma issos non si sunt fidados e non sunt torrados a bidda: sunt andados feri feri in totu sa Sardigna campende dae su cumèrtziu de cosa de mandigare;  est in custa època chi sunt cumintzadas  sas prima intrapresas cumertziales de sos tiesinos.    Moriana e su duca no ant campadu meda: su primu si nch’est mortu su 28 de santugaine de su 1802, s’àteru  su 16 de ghennàrgiu de su 1805.    Su feudalèsimu in Sardigna l’ant  abolidu petzi 36 annos a pustis,  su  21 de maju de su 1836

Ligàmenes: http://www.meilogunotizie.net/focus/storia/2086/thiesi-sa-die-de-satacu

http://lanuovasardegna.gelocal.it/regione/2012/01/12/news/s-annu-de-s-atacu-thiesi-ricorda-i-moti-antifeudali-in-sardegna-1.3635509

https://salimbasarda.net/istoria/carlo-feroce-de-su-caminu-nostru-ischimus-chie-fiat/

https://salimbasarda.net/istoria/ammentamus-oe-frantziscu-cilocco-mortu-barbaramente-su-30-de-austu-1802/

Leave a comment

1 Comment

  1. EFFISIO LUGAS
    Figlio di Francesco Maria e di Rosa Carta, nato il 2 agosto 1778 a Cagliari
    Sottotenente nelle milizie urbane nel 1794
    Sottotenente nella compagnia leggera di Marina nel 1806
    Sottotenente nel battaglione Reale di Marina nel 1809
    Luogotenente in detto nel 1810
    Capitano in secondo nella Divisione leggera nel 1818
    Maggiore con la pensione di ritiro di £. 1680, il 4 settembre 1832
    Alla vedova, Francesca Deidda è accordata la pensione il 29 febbraio 1851
    Nel 1799 partecipò alla spedizione in Gallura contro i Barbareschi, nel 1800 in quella per sedare le turbolenze nel dipartimento di Anglona e nel villaggio di Tiesi nella quale fu ferito ad un braccio, nel 1802 contro i fuoriusciti in Gallura, nel 1806 contro i Barbareschi a Carloforte, nel 1806 si recò in Spagna per reclutare personale arruolando 360 uomini, nel 1812 contro i Barbareschi alla Maddalena.

Send a Comment

S'indiritzu email tuo no at a èssere publicadu. Is campos pedidos sunt signados *