Est ufitziale: sa versione in limba sarda de su navigadore lìberu e a còdighe abertu Firefox est a disponimentu dae sa versione 111 pro su sistema operativu mòbile Android e pro sos elaboradores de iscrivania (Linux, Mac e Windows).
Impignados dae tempus pro chi su sardu siat impreadu in sa tecnologia, sos voluntàrios de s’assòtziu Sardware ant dadu a ischire sa noa: a pustis de prus de un’annu de traballu, sa tradutzione de Firefox est acumprida. Pro chi atualizent sa versione de su navigadore, sos utentes, cunforma a su dispositivu issoro, podent sighire sas istrutziones in s’immàgine:
Unu passu a dae in antis e de vàllia chi s’agiunghet a sas fainas ghiadas dae Sardware in contu de limba sarda in su mundu digitale, cun una mirada particulare a sos produtos lìberos. Ammentemus, pro nàrrere, Ubuntu Touch (sistema operativu pro dispositivos mòbiles), uNav (navigadore Gps pro Ubuntu Touch), Mastodon (rete sotziale), Jitsi (programma multiprataforma pro vìdeos-cunferèntzias), Telegram (cliente de messagìstica), DuckDuckgo (motore de chirca seguru chi no ischedat a sos utentes). A si dedicare a sos aplicativos lìberos e a còdighe abertu cheret nàrrere finamentas a contribuire a sa gherra contra sa pèrdida de de sos deretos e de sas libertades digitales chi, a dolu mannu, sunt semper in perìgulu.
Sardware, pro custas punnas, chircat persones chi potzant contribuire a sos progetos issoro. In alternativa, est possìbile dare unu contributu econòmicu pro agiuare s’assòtziu a mantènnere un’infrastrutura tecnològica.
Sa tradutzione de Firefox in sardu est unu passu de giudu in sa caminera conca a sa normalizatzione linguìstica in àmbitu tecnològicu. Su navigadore est impreadu dae milliones de persones e est disponìbile in belle chentu variedades linguìsticas fintzas de minoria (in prus de su sardu fintzas catalanu e lìgure, intre sas àteras).
Gianfranca Orunesu
(Crèditos immàgine: assòtziu Sardware)
Leave a comment