Duos meses a como s’amministratzione comunale de Tàtari aiat annuntziadu chi fiat prontu su dinare de gastare in s’ex Colonia campestre. Como sa giunta at fatu un’àteru passu, aprovende su progetu de fatibilidade economica pro torrare a nou su fràigu chi dat in carrera de Zara, cun s’idea de bi pònnere ufìtzios comunales.
Si tratat de un’interventu de 6,5 milliones de èuros, cun su progetu afidadu a s’istùdiu de sos architetos Cenami, Simonetti e Ticca, e pro su cale ant incaminadu finas sa protzedura negotziada pro s’apaltu integradu.
Un’àteru passu at a èssere a aprovare su progetu, afidadu a s’agrònomu Candido Maoddi, pro adatare s’olivàriu a zona de birde urbanu, cun àteros 900 mìgia de euros.
In sas dies coladas aiant aprovadu su progetu, redatadu dae s’ingenieri Aldo Sini, pro cumpletare s’ala noa de s’ex iscola e pro restruturare sa betza, chi como est ocupada dae su setore de sos Servìtzios Sotziales.
(sa redatzione)
Leave a comment