Su 28 de abrile, in ocasione de Sa Die de sa Sardigna, in Tàtari ant inauguradu unu monumentu in memòria de sos màrtires angioyanos.
Su tretu seberadu est su giassu, oe in bia Quarto, in ue unu tempus ddoe fiat sa furca e in ue sos patriotos fiant mortos impicados. Fiat extra muros, no a tesu meda dae sa parte betza de sa tzitade.
In antis de èssere su logu de sas esecutziones capitales ddo’aiat su cumbentu betzu de sos carmelitanos. In tempos prus reghentes, giai in su de binti sèculos, ddoe fiat s’ortu botànicu tzitadinu.
Su monumentu dd’at creadu Vittore Loriga, professore in su Litzeu artìsticu Figari. Sos patriotos chi est dedicadu sunt: Antonio Vincenzo Petretto, Giovanni Antonio Mereglias, Filippo Serra, Salvatore Chessa, Gaspare Sini, Giovanni Pintus, mutidu su Topu, Luigi Martinetti e Francesco Cillocco. Ddos aiant mortos intre su 6 de santugaine de su 1796 e s’11 de austu de su 1802.
Sos promotores de s’initziativa sunt Sa Domo de Totus, ANS (Assemblea Natzionale Sarda), Collettivo Universitario Indipendente Bardana, S’Arza Teatro, Intergremio, Cobas Scuola Sardegna e su Litzeu Artìsticu Figari. A su progetu pro sa Die de sa Sardigna ant partetzipadu àteras duas iscolas puru, su Litzeu Azuni e su Margherita di Castelvì.
S’idea de recuperare e valorizare una parte importante de s’istòria de Tàtari e de Sardigna est partida giai dae ora, cando sos sòtzios responsàbile de s’initziativa aiant cumintzadu a innetiare s’àrea, finas a issara abbandonada e male sestada.
In custos annos ant cuntribuidu a ammentare s’importàntzia de su logu sos istòricos Federico Francioni e Piero Atzori.
Su monumentu est costadu bator mìgia èuros e dd’ant finantziadu sos promotores etotu. A chie cheret dare unu cuntributu econòmicu podet pònnere dinari tràmite sa piataforma de crowd founding in lìnia Produzioni dal basso.
(gianni muroni)
Leave a comment