Tàtari, dote de Santu Nigola

Tàtari, dote de Santu Nigola

Eris 6 de nadale fiat sa festa de Santu Nigola, patronu de Tàtari. Che a semper, b’at àpidu una tzelebratzione in su duomo, presèdida dae mussegnor Saba, cun sos satzerdotos de sa tzitade.

Santu Nigola, originàriu de s’antiga Arsìnoe, in Lìtzia, in sa costa mediterrànea de sa penìsula anatòlica, fiat nàschidu in su de tres sèculos in una famìllia cristiana.

Sa traditzione contat chi, ischende ca un’òmine chi teniat tres fìgias, non tendende bastante dinari, cheriat fàghere de sas pitzocas tres fèminas malas, aiat ghetadu a s’iscuse, a de note, pro tres note in fatu de pare, dinari pro sa dote, in modu de las fàghere cojuare.

A custu si depet sa costumàntzia de pònnere regalos in sas mìgias a sos pipios sa die de s’Epifania e massimamente, in sos paisos nòrdicos, s’identificatzione de Santu Nigola cun chie batit sos regalos de Pasca de nadale.

Cunforma a sa traditzione istòrica, est usu in Tàtari regalare una dote a sas isposas. Ogna annu, sa die de su santu, a sa fine de sa missa, faghent s’estratzione intre sas parròchias tzitadinas chi si sunt candidadas.

Ocannu fiant sete: Nostra Segnora de su Late Durche, Santa Maria de Pisa, su Coro de Gesùs, Santu Piu X, Santu Gaine màrtire, de Bancali, Mater Ecclesiae e Santu Nigola-Santa Caderina.

Su tantu in dinari, de 9 mìgia èuros, est andadu a tres pitzocas, una de su Coro de Gesùs, una de Santu Gaine e una de Santu Nigola-Santa Caderina.

Sas àteras parròchias ant leadu 2400 èuros peròmine prus bestimenta regalada dae sos butegheris.

A su tantu cumplessivu a dispositzione, de 36.710 èuros, ant cuntribuidu Comuna, Fondazione Righi, Fondazione di Sardegna, Fondazione Accademia, Banco di Sardegna, Rotary, Inner Wheel, Congregazione dei Filippini Sassari, Ordine Equestre del Santo Sepolcro di Gerusalemme, sas parròchias de Mater Ecclesiae, Santu Nigola-Santa Caderina, Santa Maria de Pisa e tzitadinos privados.

(luca foddai)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *