Sa presentada de su volùmene “Figure politiche per il futuro dell’Europa”, imprentadu dae sa Coppieters Foundation de Brussel cun s’Istitutu Bellieni, in sas dies coladas est istada un’oportunidade pro propònnere craes de letura diferentes pro su tempus benidore de s’europa. In sa Biblioteca universitària de Tàtari, sa presentada de su libru s’est bortada in una cunferèntzia internatzionale, capatze de bogare a campu unau pensamentu fungudu subra a su passadu, su presente e su benidore de su continente nostru.
Su libru est imprentadu in Italianu, Inglesu e sardu, cun un’anàlisi cumparada de pensadores chi ant sinnadu s’istòria de s’autonomismu europeu. Figuras che a sas de Camillo Bellieni e Maurits Coppieters, Marianna Bussalai, Alfonso Castelao, Émile Chanoux e Denis de Rougemond, Edmond Simeoni e Antonio Simon Mossa. A dare contu de sas chircas sunt istados sos relatores Didier Rey, Giangiacomo Vale, Stefano Lavra e Antonello Nasone chi, paris cun àteros istudiosos che a Álvarez e Cobbaert, ant dadu su contributu issoro a sas fainas.
S’atopu est istadu introduidu dae sos saludos istitutzionales de su diretore de sa Biblioteca universitària, Giovanni Fiori, de sa presidente de s’Is.Be, Maria Doloreta Lai, de Antonello Nasone e Hana Kreso in rapresentàntzia de sa Coppieters Foundation.
S’atividade est parte integrànte de su programma istitutzionale Is.Be pro su 2026 finantziadu dae sa RAS cun sos contributos de sa LR 2/2026.