Tancat in positivu, rispetu a su 2020, su bilàntziu 2021 de su tràficu mertzes e passegeros in sos portos de Sardigna, cun unos cantos setores chi ant fatu nùmeros che a cussos in antis de sa pandemia.
Sos passegeros, rispetu a su 2020, sunt crèschidos de su 38%. E si podet nàrrere su matessi de su tantu chi pertocat sas tratas pro sa ìsulas minores, chin su 39% in prus rispetu a su 2020. Abarrat prus bassu, rispetu a su 2019, su mercadu de sas crocieras: in su 2021 a Sardigna est arribadu s’87% de passegeros in mancu.
S’isetu pro su cumpartu in su 2022 paret bonu, bidende sa programmatzione de sos iscalos crocierìsticos pro s’annu in pessu cumintzadu, chi s’acùrtziat a cussa in antis de su Covid.
Tancat bene su setore de su tràficu mertzes, su 15% in prus in su 2021 rispetu a s’annu in antis: dae sos 38 miliones de tonnelladas a sos 44 in s’annualidade in pessu acabbada.
“Percentuales chi bestint ànimu, chi dant a bìdere una lughe in fundu a s’iscuru, – narat Massimo Deiana, presidente de s’Sutoridade de su Sistema portuale de su mare de Sardigna – semus prontos a castaire a su benidore prus animosos, cun s’obietivu de rèndere prus cumpetitivos, a livellu internatzionale, totu sos 8 portos sardos”.
Mariantonietta Piga
Leave a comment