Su Intergovernmental Panel on Climate Change (IPCC), grupu interguvernativu a subra de sos cambiamentos de su clima de s’ONU at publicadu s’ùrtima relata. Ùrtima in su sensu chi dae como non nd’essint a campu prus pro deghe annos, in su 2033 sa mudada de su tempus at a èssere arressada, abbacada nessi unu pagu, o in una situatzione gasi grae chi non si podet prus torrare borta.
S’istùdiu, chi si podet lèghere inoghe in inglesu, incùngia totu su chi s’iscièntzia at naradu in custos annos: raighinas, proas, arriscos e solutziones. Non b’at duda chi su cambiamentu esistit, est andende a dae in antis e chi sa neghe est de s’anidride carbònica produida dae sos combustìbiles fòssiles. Sas proas sunt sas temperaduras semper prus artas, sos disacatos fitianos ligados a su tempus chi sunt capitende in su mundu e fintzas sos problemas a sa massaria. Est dae annos chi su IPCC est istudiende e regollende datos e chircas e su pidinu est mannu.
Su segretàriu de s’ONU, Antonio Guterres, presentende sa relata at naradu chi «est sa guida pro disinnescare sa bomba» e chi sos datos narant duas cosas: chi sa crisi est prus lestra de cantu si pensaiat, ca oramai sa crèschida de unu gradu e mesu de sa temperadura est segura; e chi sas medidas seberadas dae sos guvernos sunt tropu dèbiles e chi bisòngiat andare prus in presse de s’andanta de sos polìticos de su mundu. Tando sa punna pro totu sos Paisos depet èssere sa “neutralidade carbonica”, chi cheret nàrrere menguare su luòngiu e a su matessi tempus prantare fundos e immagasinare anidride carbònica, gasi chi si nde at a produire cantu si nde bogat dae s’àera.
Amus a bìdere deghe annos dae como comente at a èssere sa situatzione: su disafiu est mannu e sos gastos puru.
Gabriele Tanda
Leave a comment