A tres annos de su comintzu de sa gherra tzivile, su Sudan est oe una natzione partzida e paralizada. Cando chi s’atentzione de su mundu est pro s’oriente mesanu, sa cuntierra intre s’esèrtzitu regulare de su generale al Burhan e sas Rapid Support Forces (Rsf) de Hemedti est intrada in unu limbu perigulosu meda. Su paisu est partzidu in duos: s’esèrtzitu còmpidat s’est, Khartùm e s’isbocu istratègicu de Port Sudàn; sas Rsf dòminant su Darfur e s’ovest. A mesu tretu, sa regione de su Kordofan est unu fronte immòbile ue su sàmbene chi brotat est manantiale. Su fallimentu de sa diplomatzia est totale. Sa proposta americana de una trègua e de una transitzione tzivile, avantzada su mese de cabudanni de s’annu coladu, non est prus ritza dae su de santandria pro more de sos de al Burhan, chi refudant de legitimare su guvernu parallelu de sos paramilitares. Sas raighinas de sa cuntierra sunt profundas e prenas de òdiu ètnicu: sas Rsf, erederas de sos janjawid, sunt incurpadas de violèntzias sessuales sistemàticas e de mortores de massa, feridas mai cosidas chi non podent giuare a su diàlogu. Su Sudan est oramai su terrinu de una gherra de procura prus chi non perigulosa. Si Egitu e Aràbia Saudita sustenent s’esèrtzitu pro garantire s’istabilidade, sos Emirados àrabos unidos sunt incurpados de finantziare sas Rsf. De reghente, fintzas s’Etiòpia est intervènnida in agiudu de sos paramilitares in funtzione anti-egitziana, complichende galu de prus sa rete de alleàntzias. Su costu umanu est catastròficu: noe milliones de disterrados, 14 milliones de pessones sena perunu amparu alimentare e unu sistema sanitàriu chi est a ghiaja. Cun sos agiudos umanitàrios blocados in sos portos de su Gulfu e sos prètzios de su carburante artziados a sos isteddos, su Sudan est vivende sa peus crisi umanitària de su praneta, in intro de unu mudìmene de una comunidade internatzionale pagu atenta.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment